BAAda odam savdosi bilan shug‘ullanganlikda ayblangan o‘zbekistonlik ayol mamlakatdan deportatsiya qilindi. Bu haqda Interpolning O‘zbekistondagi Milliy markaziy byurosi xabar berdi.
Ma’lum qilinishicha, ayol sotish va ekspluatatsiya qilish maqsadida yaxshi haq to‘lanadigan ish va’da qilib, qizlarni BAAga olib borgan va u yerda pasportlarini olib qo‘yib, fohishalik bilan shug‘ullanishga majburlagan.
Ayol O‘zbekistonni tark etgani bois unga nisbatan sudlanuvchi sifatida sirtdan qaror chiqarilgan bo‘lgan. U 2013-yildan beri Interpol kanallari orqali xalqaro qidiruvda bo‘lgan.
“Bugungi kunga kelib Interpol MMB va Buxoro viloyati IIB xodimlarining muzokaralari va birgalikdagi tezkor harakatlari tufayli qidiruvda bo‘lgan ayol BAA huquq-tartibot idoralari tomonidan qo‘lga olinib, O‘zbekistonga deportatsiya qilindi”, — deyiladi xabarda.
Avvalroq Samarqandda ikki qizni Turkiyaga fohishalikka yubormoqchi bo‘lgan shaxs ushlangani, Samarqandda ona-bola 22 yoshli qizni aldab, fohishalik uchun Turkiyaga yubormoqchi bo‘lgani aniqlangani, Xorazmda uch nafar qizni Dubayga fohishalik qilish uchun jo‘natishga uringan shaxslar qo‘lga olingani to‘g‘risida xabar berilgandi.
Izoh (0)