БААда одам савдоси билан шуғулланганликда айбланган ўзбекистонлик аёл мамлакатдан депортация қилинди. Бу ҳақда Интерполнинг Ўзбекистондаги Миллий марказий бюроси хабар берди.
Маълум қилинишича, аёл сотиш ва эксплуатация қилиш мақсадида яхши ҳақ тўланадиган иш ваъда қилиб, қизларни БААга олиб борган ва у ерда паспортларини олиб қўйиб, фоҳишалик билан шуғулланишга мажбурлаган.
Аёл Ўзбекистонни тарк этгани боис унга нисбатан судланувчи сифатида сиртдан қарор чиқарилган бўлган. У 2013 йилдан бери Интерпол каналлари орқали халқаро қидирувда бўлган.
«Бугунги кунга келиб Интерпол ММБ ва Бухоро вилояти ИИБ ходимларининг музокаралари ва биргаликдаги тезкор ҳаракатлари туфайли қидирувда бўлган аёл БАА ҳуқуқ-тартибот идоралари томонидан қўлга олиниб, Ўзбекистонга депортация қилинди», — дейилади хабарда.
Аввалроқ Самарқандда икки қизни Туркияга фоҳишаликка юбормоқчи бўлган шахс ушлангани, Самарқандда она-бола 22 ёшли қизни алдаб, фоҳишалик учун Туркияга юбормоқчи бўлгани аниқлангани, Хоразмда уч нафар қизни Дубайга фоҳишалик қилиш учун жўнатишга уринган шахслар қўлга олингани тўғрисида хабар берилганди.
Изоҳ (0)