“Muxlislar jamoaning bunday ayanchli holatga kelib qolishiga nima sabab bo‘lganini bilishi kerak”. “Barselona” prezidenti Xoan Laporta avvalgi rahbariyatning moliyaviy qallobliklari haqida gapirdi

“Barselona” prezidenti Xoan Laporta Jozep Bartomeu boshchiligidagi avvalgi rahbariyatning moliyaviy qallobliklari haqida gapirdi.

Rahbariyat bizda qanday resurslar mavjudligini bilish uchun klubning iqtisodiy holatini tahlil qilmoqchi edi. Tegishli tekshiruvni o‘tkazganimizdan so‘ng, ba’zi shubhali operatsiyalarni aniqladik.

Asossiz, insofsiz va nomutanosib to‘lovlar aniqlandi. Bu esa klub budjeti noto‘g‘ri boshqarilgani, bu ishga aloqador insonlarning boyib ketganini tasdiqlaydi.

To‘plangan barcha hujjatlar prokuraturaga topshirildi. Ularda inkor etib bo‘lmaydigan ma’lumotlar mavjud. Sosyoslar (klub muxlislari) jamoaning bunday ayanchli holatga kelib qolishiga nima sabab bo‘lganini bilishlari uchun ham bu ishni qilishimiz lozim edi.

Hayratdaman. Faktlarni xabar qilishga qaror qildik, chunki biz politsiya yoki sud emasmiz va sud jarayonlarida klub resurslaridan foydalanmoqchi emasmiz. Prokuratura aybdorlarni aniqlaydi.

Xoan Laporta, “Barselona” prezidenti

Ma’lumot uchun, Xoan Laporta 2003—2010-yillar davomida ham “Barselona” prezidentligi vazifasini bajargan. Uning boshqaruvida Kataloniya klubi to‘rt bor La Liga va ikki marta Chempionlar Ligasida muvaffaqiyat qozongan.