Андижонда безорилик ва зўравонлик билан шуғулланувчи 28 ёшли аёлга тўртинчи марта суд ҳукми ўқилди

Андижон вилояти Асака туманда безорилик ва зўравонлик билан шуғулланувчи 28 ёшли аёлга тўртинчи маротаба суд ҳукми ўқилди. Бу ҳақда «Дарё»га Андижон вилояти суди матбуот хизмати маълум қилди.

Жиноят ишлари бўйича Асака тумани суди раиси Раҳматилло Раҳимовнинг маълум қилишича, муқаддам уч маротаба судланган Н.Б. (1994 йилда туғилган) 2021 йил 15 апрель куни соат 10:00 ларда «Меҳнатобод» маҳалласида фуқаро Д.С.нинг йўлини тўсиб, юз қисмига қўли билан уриб, унга нисбатан ҳаёт ва соғлиқ учун хавфли бўлмаган зўрлик ишлатган ҳолатда, жабрланувчининг қўлида бўлган Redmi 7 телефон аппаратини олиб қўйган.

Шунингдек, Н.Б. ўзининг жиноий ҳаракатларини давом эттириб, 10 май куни соат 13:30 ларда туманнинг «Беруний» маҳалласида фуқаро М.У.ни уриб, унинг қўлида бўлган бир дона 3 миллион 500 минг сўмлик Vivo-1915 телефони ҳамда 100 доллар миқдоридаги пулни зўрлик ишлатиб олиб қўйган.

Бундан ташқари, Н.Б. 2021 йилнинг 1 май куни соат 12:00 атрофида жамоат жойи ҳисобланадиган Асака туман аҳоли бандлигига кўмаклашиш марказида ходими Н.К. билан ҳеч бир сабабсиз жанжаллашиб, уни уриб-дўппослаган. Қўлида бўлган ғишт бўлаги билан яна бир фуқаро Р.К.ни чап қўлига уриб, шикаст етказган. Ажратмоқчи бўлган фуқаролар Ш.С. ва Д.Й.га қаршилик кўрсатиб, уларни ҳам сабабсиз уриб, тан жароҳати етказган. Марказ ҳисобхонасидаги моноблок, компьютер ҳамда стол-стулларни улоқтириб зарар етказган. Бино атрофида турган И.Т. бошқарувидаги Malibu машинасига ҳам тош ва ғишт бўлакларини отиб, автомашинани олд ойнасини синдириб, техник шикаст етказган.

Суд ҳукми билан Б. Н. Жиноят кодексининг 166-моддаси (талончилик) 3-қисмининг «а» банди, 277-моддаси (безорилик) 3-қисмининг «а, г» бандлари, 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) 1-қисмида назарда тутилган жиноятларни содир этганликда айбли деб топилган. Унга нисбатан 2 миллион 230 минг сўм жарима ҳамда 3 йил 6 ой муддатга озодликдан маҳрум қилиш жазоси тайинланган.

Ундан Асака тумани аҳоли бандлигига кўмаклашиш маркази фойдасига 5 миллион 610 минг сўм, жабрланувчи И.Т. фойдасига эса 645 минг сўм моддий зарар ундириш белгиланган.