Qozog‘iston prezidenti Qosim-Jo‘mart To‘qayev prezident lavozimda ikki muddatdan ortiq qolish niyati yo‘qligini ma’lum qildi.
“Qancha vaqt Qozog‘iston prezidenti bo‘lishimni bilmayman, lekin bir narsa aniqki, Konstitutsiyaga muvofiq ikki muddatdan ortiq (prezident — tah.) bo‘lmayman. Ya’ni qonunlar, ayniqsa, Konstitutsiya qayta yozilmaydi”, — dedi To‘qayev “Xabar 24” davlat telekanaliga bergan intervyusida.
Qozog‘iston rahbari uning prezident sifatidagi vazifasi butun jamiyat, siyosiy tizim va iqtisodiyotni tubdan o‘zgartirishda ijobiy natijalarga erishish ekanini ta’kidladi. U, shuningdek, respublikada parlament tizimini isloh qilish to‘g‘risida jiddiy bosh qotirayotganini aytdi.
“Aytishim mumkinki, mamlakatimizdagi parlament tizimini va albatta, partiya tizimini isloh qilish haqida jiddiy o‘ylayapman. Chunki 28-yanvar kuni Nur Otan partiyasi qurultoyida davlat rahbari sifatida bu haqda aytganimdek, men barcha jamoat, partiya va siyosiy tuzilmalardan yuqori turishim zarur, deb hisoblayman. Bu turli ijtimoiy-siyosiy kuchlarni davlatimiz manfaatlaridan kelib chiqadigan pozitsiyasi bo‘yicha umumiy maxrajga olib kelish uchun o‘ziga xos magnit bo‘lib xizmat qiladi”, — deya tushuntirdi u.
Qozog‘iston prezidenti Respublika Xavfsizlik kengashiga raislikni o‘z zimmasiga olish masalasi qanday hal qilingani to‘g‘risida ham gapirdi.
“(Yanvar tartibsizliklari paytida – tah.) Xavfsizlik kengashi raisligini zudlik bilan hal qilish kerakligi to‘g‘risida muzokara bo‘ldi, o‘shanda vaziyat keskinlashayotgan edi: yashirmayman, o‘sha paytda hozir xalqqa murojaat qilib, bundan buyon Xavfsizlik kengashining raisi men ekanimni aytishim zarurligi masalasini o‘zim ko‘tardim. Bu masala tom ma’noda yo‘l-yo‘lakay hal qilindi”, — dedi u.
Shuningdek, To‘qayev Qozog‘iston birinchi prezidenti Nursulton Nazarboyev bilan hokimiyatni bo‘lib olish ustida savdolashmagani haqida gapirdi.
“Hech qanday savdolashuv bo‘lgani yo‘q. Shaxsiy imtiyozlar haqida gap bo‘lmadi. Gap faqat Xavfsizlik kengashidagi maqom haqida edi”, — deya ta’kidladi davlat rahbari.
Mavzuga doir: Nazarboyev Nur-Sultonda qolgan va To‘qayev bilan aktivlarni bo‘lishib olish haqida muzokaralar olib bormoqda — The Guardian
Tartibsizliklar fonida To‘qayev Nazarboyevning o‘rniga Xavfsizlik kengashi rahbari vakolatlarini zimmasiga oldi. Nazarboyev matbuot kotibining aytishicha, u ushbu lavozimini amaldagi prezidentga o‘z ixtiyori bilan topshirgan.
28-yanvar kuni esa To‘qayev Qozog‘istondagi hukmron Nur Otan partiyasining raisi etib saylandi. Mazkur siyosiy uyushma tashkil etilgan 1999-yildan buyon unga Nazarboyev rahbarlik qilib kelayotgandi.
Avvalroq Nazarboyev amaldagi prezident “butun hokimiyatga ega” ekani va Qozog‘iston siyosiy elitasida hech qanday ziddiyat yo‘qligi haqida gapirgandi.
27-yanvar kuni Qozog‘iston Senati Nazarboyevga tegishli bo‘lgan elboshi maqomini o‘zgartirish tashabbusi bilan chiqdi. Mamlakat Senati ichki va tashqi siyosatning asosiy yo‘nalishlarini endi birinchi prezident bilan muvofiqlashtirmaslikni taklif qilgan. Hozirda Nazarboyev respublika Konstitutsiyaviy Kengashiga kirish huquqini saqlab qolmoqda.
Izoh (0)