Rossiyada oxirgi sutka davomida 113 122 kishida koronavirus tasdiqlandi, deb xabar bermoqda COVID-19 ga qarshi kurash bo‘yicha federal tezkor shtab. Pandemiya boshidan buyon birinchi marta mamlakatda ushbu infeksiya bilan kunlik kasallanishlar soni olti xonali raqamlarni ko‘rsatmoqda.
Xabarga ko‘ra, 28-yanvar kuni 14 570 kishi koronavirus bilan kasalxonaga yotqizilgan, 668 nafar bemor vafot etgan. Eng ko‘p kasallanish holatlari Moskva (26 488 kishi), Sankt-Peterburg (14 939) va Moskva viloyatida (10 725) qayd etilgan.
Operativ shtab ma’lumotlariga ko‘ra, Rossiyada so‘nggi 24 soat ichida 30 010 kishi kasallikdan sog‘aygan.
Pandemiya boshidan beri shtab COVID-19 ga chalinish bo‘yicha 11 615 779 ta holatni ro‘yxatga olgan, jami 330 111 kishi infeksiya qurboni bo‘lgan.
Umuman olganda, Rossiyada koronavirus bilan kunlik kasallanishlar soni bir haftadan buyon tinimisiz rekord o‘rnatmoqda. 27-yanvar kuni mamlakatda 98 040 kishida koronavirus aniqlangandi.
Shuningdek, bir sutkada infeksiyaga chalinganlar soni 26-yanvar holatiga 88 816 kishini, 25-yanvar holatiga 74 692 kishini, 24-yanvar holatiga 65 109 kishini, 23-yanvar holatiga 63 205 kishini, 22-yanvar holatiga 57 212 kishini tashkil etgan.
Rossiyada koronavirusning yangi to‘lqini omikron shtammi tarqalishi fonida boshlandi. Avval “Rospotrebnadzor” rahbari Anna Popov vaziyat yomonlashsa, kunlik kasallanishlar soni 100 ming kishidan oshishi mumkinligidan ogohlantirgan edi.
Kreml mamlakatda lokdaun joriy etish uchun hozircha hech qanday sabab ko‘rmayotganini bildirgan. Prezident matbuot kotibi Dmitriy Peskovning ta’kidlashicha, omikron tarqalishi fonida, kasallanganlar soniga emas, balki kasalxonaga yotqizish ko‘rsatkichlariga e’tibor qaratish muhimroq. “Hozircha bu yo‘nalishda ‘portlash’ kuzatilmayapti”, — deya qo‘shimcha qilgan u.
Mavzuga doir:
Izoh (0)