26-yanvar kuni O‘zbekiston Vazirlar Mahkamasining “Aviaspottingni rivojlantirish uchun shart-sharoitlar yaratish chora-tadbirlari to‘g‘risida” qarori qabul qilindi. Uzbekistan Airports matbuot xizmatining ma’lum qilishicha, mazkur hujjatda mamlakatning ijobiy imijini shakllantirish va sayyohlik salohiyatini oshirish, mahalliy aeroportlar va aviakompaniyalarni tan olishga qaratilgan qator chora-tadbirlar nazarda tutilgan.
Hukumat qaroriga ko‘ra, 2022-yil 1-mayga qadar respublikaning barcha xalqaro aeroportlari hududida aviaspotting uchun ixtisoslashtirilgan joylar paydo bo‘ladi. Shuningdek, 1-mayga qadar xalqaro aeroportlarga tutash hududlarda havo kemalarini suratga olishni xohlovchilar uchun barcha zarur infratuzilmaga ega tomosha maydonchalari quriladi.
“O‘tgan yilning 22-oktabr kuni O‘zbekiston tarixidagi ilk rasmiy spottingni (aeroportlarni suratga olish) o‘tkazganimizda, uch oydan keyin aviatsiyaga mehr qo‘ygan insonlar uchun vaziyat bu qadar keskin o‘zgarishini tasavvur qilish qiyin edi. Ilgari ularga aeroportdan kilometr uzoqlikda turish va samolyotlarni suratga olish taqiqlangan bo‘lsa, endi aeroportlar o‘z eshiklarini ochib, do‘stona munosabatda bo‘lishadi.
O‘zbekistonda aviaspotterlarni yuqori darajada qo‘llab-quvvatlanayotganidan juda xursandman. Hamma mamlakatlarda ham qonunchilik bazasida bunday hujjatlar mavjud emas. Bu mamlakat imiji va turizmni rivojlantirish uchun juda katta qadamdir. Ushbu muhim hujjatni ishlab chiqishda Uzbekistan Airports kompaniyasi ham o‘z hissasini qo‘shganidan boshim ko‘kka yetti. Endi bizning vazifamiz boshqa idoralar bilan hukumat qarorida belgilangan barcha ishlarni birgalikda amalga oshirishdan iborat”, — deydi Uzbekistan Airports boshqaruvi raisi Ra’no Jo‘rayeva.
Bundan tashqari, hujjat bilan 2022-yilning 1-mayidan boshlab har chorakda mahalliy havaskorlar va professional aerodropchilar uchun mavsumiy musobaqalar, shuningdek, xorijiy aviaspotchilar ishtirokidagi yillik musobaqalar o‘tkaziladi. Yoshlar uchun ochiq eshiklar kuni va mamlakat xalqaro aeroportlariga ekskursiyalar tashkil etish rejalashtirilgan. Shuningdek, Uzbekistan Airports kompaniyasiga Mudofaa vazirligi va Toshkent shahar hokimligi bilan birgalikda O‘zbekiston Milliy aviatsiya muzeyini tashkil etish masalasini ishlab chiqish topshirilgan.
Avvalroq O‘zbekistonda aeroportlar xususiylashtirilmasligi, chunki “bunday sog‘in sigir o‘zimizga ham kerakligi” aytilgandi.
Izoh (0)