O‘zbekistonning aksar hududlarida 25-yanvar kuni elektr energiyasi, tabiiy gaz va suv ta’minoti uzilgandi. “Hududgazta’minot” gaz ta’minoti qayta tiklanayotgani sabab iste’molchilarga murojaat bilan chiqdi.
Qayd etilishicha, poytaxtda va mamlakatning boshqa hududlarida gaz ta’minoti bosqichma-bosqich tiklanmoqda. Shu munosabat bilan “Hududgazta’minot” AJ fuqarolardan uylar va xonadonlar ichidagi gaz uskunalarini, xususan, gaz plitalarini, isitish va suv isitgich asboblarini hamda dudbo‘ronlarni puxta tekshirishni so‘ragan.
“Maishiy uy yoritgichlari va boshqa elektr jihozlarini yoqishdan oldin xonaga kirib, uning ichida gaz hidi (boshqa begona hidlar) yo‘qligiga ishonch hosil qilishingiz va faqat shundan keyingina elektr energiyasidan foydalanishingiz kerak”,- deyiladi xabarda.
Ko‘p qavatli turar joy binolarida zamonaviy elektr asboblari va ikki konturli qozonlardan foydalanishda xavfsizlik texnikasiga amal qilish zarur. Agar isitish qozoni yerto‘lada joylashgan bo‘lsa, u soz ahvolda ekaniga ishonch hosil qilish lozim.
“Hududgazta’minot” AJ fuqarolardan isitish moslamalaridan foydalanishda o‘ta ehtiyotkor bo‘lishni va “zangori” yonilg‘idan oqilona, isrof qilmay foydalanishni iltimos qilgan.
“Hisobga olish (o‘lchash) asbobi o‘chib qolgan taqdirda, barcha gaz ishlatadigan uskunalarni o‘chirib qo‘yish, so‘ng markaziy ko‘k rangli ENTER tugmasini uch marta bosib, 6 daqiqa kutib turish kerak.
Gaz ta’minoti bilan bog‘liq muammolarni hal qilish uchun kecha-yu kunduz ishlaydigan Call-markaziga (1104), avariya-dispetcherlik xizmatiga (104) hamda Facebook ijtimoiy tarmog‘idagi “Gaz ta’minoti muammolari va ularni hal qilish yollari” jamoat guruhiga murojaat qilishingiz mumkin”, — deyiladi “Hududgazta’minot” murojaatida.
O‘zbekistonda kuzatilgan elektr energiyasining yirik nosozligi xronologiyasi
25-yanvar kuni soat 11:00 larda O‘zbekistonning qator viloyatlarida elektr energiyasi ta’minoti uzildi. Toshkent metropoliteni faoliyati ham to‘xtagan, Respublikadagi barcha poyezdlar o‘z manzillariga kechikib yetib borishi aytilmoqda. Toshkent shahar IIBB esa tibandliklarning oldini olish maqsadida ko‘chaga zarurat bo‘lmasa, shaxsiy mashinada chiqmaslikni tavsiya qilgandi.
Energetika vazirligi ma’lumotlariga ko‘ra, hozirda Toshkent viloyatidagi Chorvoq, Hojikent va Tovoqsoy gidroelektr stansiyalari, Navoiy viloyatidagi Navoiy issiqlik elektr stansiyasi, Qoraqalpog‘iston Respublikasidagi Taxiatosh issiqlik elektr stansiyasi hamda Farg‘ona viloyatidagi Farg‘ona issiqlik elektr markazi orqali energetika tizimiga quvvat uzatish boshlangan.
Mavzuga doir: “Toshkentda svet o‘chganiga hayron qoldim”. Poytaxt aholisi va mehmonlari elektr energiyasidagi uzilishlar haqida (video)
Keyinroq Prezident matbuot kotibi Sherzod Asadov “vaziyat shaxsan prezident nazorati ostida” ekanini ma’lum qilib, fuqarolarni sarosimaga tushmaslikka chaqirdi. Shavkat Mirziyoyev topshirig‘i bilan elektr energiyasida kuzatilayotgan nosozlik bo‘yicha komissiya tuzildi. Energetika vazirligi Qoraqalpog‘iston va Xorazmda elektr energiyasi to‘liq tiklanganini xabar qildi. Toshkent shahri va Sirdaryo viloyatining bir qator hududlarida ichimlik suvi ta’minoti tiklandi. Toshkent IESning faoliyati qisman tiklanib, 7 ta energoblokdan 5 tasi barqaror ish faoliyatiga keltirildi.
Energiya tanqisligi ortidan O‘zbekiston Afg‘onistonga elektr energiyasi yetkazib berishni to‘xtatdi. Gazli, Sho‘rtan hamda Muborak neft va gaz qazib chiqarish boshqarmalaridagi 64 ta kon faoliyatini vaqtincha to‘xtatdi.
SSV Zangiota kovid-markazlaridagi elektr energiyasi bilan bog‘liq holat yuzasidan ma’lumot berdi.
26-yanvar soat 02:30 ga borib O‘zbekistonning 7 ta hududida elektr ta’minoti to‘liq tiklangani xabar qilindi.
