“Tolibon” Norvegiyada afg‘on faollari bilan muzokaralar o‘tkazdi

“Tolibon” harakatining birinchi delegatsiyasi Yevropada bo‘ldi va afg‘on fuqarolik jamiyatining a’zolari bilan muzokaralar o‘tkazdi. Bu haqda Norvegiya tashqi ishlar vazirligi axborotiga tayanib, The Local xabar bergan.

Xabarga ko‘ra, Afg‘onistonda “Tolibon” tuzgan hukumatda tashqi ishlar vaziri lavozimini egallagan Amir Xon Muttaqiy boshchiligidagi delegatsiya uch kunlik tashrifning birinchi kunida ayollar huquqlari bo‘yicha faollar va jurnalistlar, keyin g‘arb diplomatlari bilan uchrashgan.

Qayd etilishicha, Norvegiya ko‘magida olib borilayotgan muzokaralar Oslodan tahqarida Soria Moria mehmonxonasida yopiq eshiklar ortida o‘tkazilgan. Kobul delegatsiyasiga “Tolibon”dagi eng shafqatsiz guruhlardan biri hisoblanuvchi “Haqqoniy” tarmog‘i yetakchisi Anasa Haqqoniy ham qo‘shilgan.

Norvegiya tashqi ishlar vaziri Anniken Xyuitfeld hali hech bir mamlakat “Tolibon” hukumatini rasman tan olmaganini qayd etgan va muzokaralarda toliblarni rasman tan olish yoki ularning xatt-harakatlariga xayrihohlikni anglatmasligini ta’kidlagan.

“Lekin biz mamlakatdagi hukumat bilan de-fakto suhbatlashishimiz zarur. Afg‘onistondagi siyosiy vaziyat eng og‘ir ijtimoiy inqirozga olib kelmasligi uchun harakat qilishimiz kerak”, — degan Norvegiya TIV rahbari.

Shuningdek, toliblar Yevropada AQSh, Fransiya, Buyuk Britaniya, Germaniya, Italiya va Yevropa ittifoqi vakillari bilan ham uchrashadi. Norvegiya rasmiylari bilan ikki tomonlama muzokaralar ham o‘tkaziladi.

Mamlakatdan chiqib ketgan Afg‘oniston strategik tadqiqotlar instituti rahbari Dovud Moradian Norvegiyaning ushbu tinchlik yo‘lidagi tashabbusini tanqid qilgan.

“Tolibon” tashqi ishlar vazirini qabul qilish ayollar huquqlariga rioya etilishi uchun kurashib kelayotgan Norvegiyaning mamlakat sifatidagi global imijiga salbiy ta’sir qiladi, chunki “Tolibon” deyarli gender aparteidini boshlagan”, — degan u.