O‘zbekistonda koronavirus bo‘yicha tashkil qilingan Call-markazlarga murojaatlar keskin ko‘paydi. Bu haqda Sog‘liqni saqlash vazirligi matbuot xizmati xabar berdi.
Mamlakatda koronavirus tarqalishining oldini olish maqsadida 2020-yil martidan boshlab 1003 qisqa raqamli Call-markaz tashkil etilgan edi. Vazirlik ma’lumotiga ko‘ra, hozir bu yerda Toshkent davlat stomatologiya instituti bilan hamkorlikda 3 smenada ish olib borilmoqda.
2022-yilning 1—20-yanvar kunlari Call-markazga jami 14 112 ta murojaat kelib tushgan. Yangi yilning dastlabki 5 kunida o‘rtacha murojaatlar soni 300-400 tani tashkil etgan bo‘lsa, navbatdagi 5 kunda ketma-ket o‘sish kuzatilib, 478 tadan 761 tagacha yetgan. Shunday qilib, 1—10-yanvar kunlari Call-markaz dispetcherlari 4512 ta murojaatni qabul qilgan.
Yanvar oyining ikkinchi o‘n kunligidan boshlab esa bu ko‘rsatkichlar sezilarli darajada oshib, murojaatlar soni kuniga o‘rtacha 900-1000 taga yetgan. Natijada oyning ikkinchi o‘n kunligida jami 9600 ta murojaat kelib tushgan. Bu 1—10-yanvar kunlaridagi ko‘rsatkichga qiyoslaganda 2 barobardan ortiqdir.
Tahlillarning ko‘rsatishicha, Call-markazga qo‘ng‘iroq qiluvchilarning katta qismi koronavirusning yangi shtammi belgilari, uni davolash yo‘llariga oid savollar bilan murojaat etmoqda.
Eslatib o‘tamiz, O‘zbekistonda koronavirusning omikron shtammi 7-yanvar kuni aniqlangandi. Shundan buyon koronavirusga chalinganlar soni orta boshladi. Xususan, 22-yanvar kuni 1478 kishida kasallik tasdiqlanib, kunlik kasallanishlar soni bo‘yicha qatorasiga beshinchi kun antirekord qayd etildi. Mamlakatda pandemiya boshidan beri koronavirusga chalingani rasman tasdiqlanganlar soni esa 213 767 nafarga yetdi.