DXX Surxondaryo viloyati bo‘yicha boshqarmasi va viloyat ichki ishlar boshqarmasi xodimlari hamkorligida o‘tkazilgan tezkor tadbirda Abdulloh Zufarlarning aqidaparastlik g‘oyalarini targ‘ib qilib kelgan shaxs ushlandi.
O‘zAning yozishicha, viloyatning Uzun tumanida yashovchi R.S. Telegram orqali “Arab tili darsi” nomli kanal tashkil etib, uning a’zolariga arab tilini o‘rgatish bahonasida Abdulloh Zufar va boshqa noma’lum shaxslar ma’ruzasini, da’vatlarini joylashtirib, tarqatish hamda targ‘ib qilish bilan shug‘ullanib kelayotgani aniqlangan.
Viloyat IIB matbuot xizmati ma’lumotiga ko‘ra, ushbu holat protsessual tarzda rasmiylashtirib olingach, Din ishlari bo‘yicha qo‘mitaning ekspertiza xulosasi olingan. Joylashtirilgan materiallar orasida qonunchilikda taqiqlangan aqidaparastlik g‘oyalari bilan yo‘g‘rilgan ma’ruzalar mavjudligi ma’lum bo‘lgan.
Mazkur holat bo‘yicha DXX Surxondaryo viloyati boshqarmasi tomonidan jinoyat ishi qo‘zg‘atilib, tergov harakatlari olib borilmoqda.
Eslatib o‘tamiz, 2021-yilning mayida IIV bir guruh shaxslar qatorida Abdulloh Zufarga nisbatan qidiruv e’lon qilgandi. Iyunda esa IIV O‘zbekistondagi konstitutsiyaviy tuzumni ag‘darishga da’vat qilgan ushbu shaxsning aniq manzilini aytgan shaxslarga mukofot puli berilishini ma’lum qilgandi.
Izoh (0)