Bugun,

  • USD 11095.31
  • RUB 173.84
  • EUR 10772.44

Toshkentda endilikda tez yordam xizmatiga tushgan chaqiriqlar saralanib, ahvoli yengil bemorlarga poliklinikalar ham tez tibbiy yordam ko‘rsatadi. Bu haqda SSV matbuot xizmati xabar berdi.

Foto: “Daryo” / Madina Nurman

Foto: “Daryo” / Madina Nurman

Toshkent shahar tez tibbiy yordam stansiyasi Call-markazi bo‘lim boshlig‘i Nasiba Mahmudovaning ma’lum qilishicha, pandemiya sharoitida aholi tez yordam xizmatiga har qachongidanda ko‘proq ehtiyoj sezmoqda.

Ma’lumotlarga ko‘ra, 2022-yil 1-18-yanvar kunlari poytaxt 103 xizmatiga jami 78 771 ta chaqiriq kelib tushgan. Shundan tana haroratining ko‘tarilishi bo‘yicha 23 335 ta, koronavirusga gumon qilingan, kasallikka chalingan va boshqa yuqumli kasalliklar bilan 2632 ta murojaat qayd etilgan.

So‘nggi 5 kun ichida shahar 103 xizmatiga bo‘layotgan chaqiriqlar soni keskin oshib, kunlik o‘rtacha 5200-5300 tani tashkil qilmoqda. Ta’kidlanishicha, yanvar oyi boshida bu raqam 3200-3400 tadan iborat bo‘lgan.

“Keyingi kunlarda tez yordam xizmatiga umumiy chaqiriqlar soni ortgani sababli shahar tez tibbiy yordam stansiyasi Call-markaziga poytaxtning 12 tumanida joylashgan markaziy poliklinikalardan mutaxassislar jalb etilib, chaqiriqlarni saralash tizimi yo‘lga qo‘yildi.

Unga ko‘ra, endilikda 103 xizmatiga murojaat qilgan bemorning shikoyatlari tinglanib, agar uning ahvoli yengil bo‘lsa, biriktirilgan xodimlar chaqiriqni o‘z hududi bo‘yicha oilaviy poliklinikalarga yo‘naltiradi. Shundan so‘ng murojaat qilgan bemorga poliklinikaning mobil brigadalari tomonidan tez tibbiy yordam ko‘rsatiladi. Og‘ir ahvoldagi bemorlar esa tez yordam xizmati bilan qamrab olinadi”, — deydi Nasiba Mahmudova.

Qayd etilishicha, bu 103 xizmati faoliyatini yaxshilash, aholiga tezkor, sifatli, eng asosiysi, ishonchli va samarali tibbiy xizmat ko‘rsatish imkonini beradi.

Shuningdek, yanvar oyida tez yordam brigadalari tomonidan koronavirus aniqlangan va ahvoli yengil fuqarolarga uyda davolanishlari uchun virusga qarshi dori-darmonlar bo‘lgan COVID-box'lar berish hamda kasallikka gumon qilingan shaxslardan ekspress-test olish ham yo‘lga qo‘yilgan.

Chaqiriqlar soni ortgani va ish yuklamasi ko‘payib borayotgani sababli kuni kecha shahar 103 xizmati tasarrufiga Sog‘liqni saqlash vazirligi tomonidan qo‘shimcha 40 ta zamonaviy jihozlangan tez tibbiy yordam mashinasi haydovchilari bilan birga biriktirib berildi. Shuningdek, Call-markaz ish samaradorligini oshirish uchun 30 ta yangi operator o‘rni yaratilgan.

Eslatib o‘tamiz, 2021-yilning fevral oyida Abdulla Azizov O‘zbekistonda tez tibbiy yordamning bir martalik tashrifi o‘rtacha 150 ming so‘mga tushishi haqida aytgan edi. May oyida esa Respublika shoshilinch tez tibbiy yordami ilmiy markazi bosh direktori Davron To‘laganov 2021-yilda bitta tez tibbiy yordam chaqirig‘i uchun 7700 so‘mdan mablag‘ ajratilganini ta’kidlagandi.

Izoh
Asosiy yangiliklar
Dunyo
Ukraina tashqi ishlar vaziri Putinning “Zelenskiyni o‘ldirmaslik” bo‘yicha bergan va’dasiga munosabat bildirdi
Sport
A Seriya. Eldor Shomurodovning debyut o‘yinida “Spetsiya” o‘zida “Napoli”ga yirik hisobda yutqazdi
Dunyo
Marsdan ham sovuqroq: AQSHda havo harorati tarixiy rekordni yangiladi (video)