Ўзбекистонда коронавирус бўйича ташкил қилинган Call-марказларга мурожаатлар кескин кўпайди. Бу ҳақда Соғлиқни сақлаш вазирлиги матбуот хизмати хабар берди.
Мамлакатда коронавирус тарқалишининг олдини олиш мақсадида 2020 йил мартидан бошлаб 1003 қисқа рақамли Call-марказ ташкил этилган эди. Вазирлик маълумотига кўра, ҳозир бу ерда Тошкент давлат стоматология институти билан ҳамкорликда 3 сменада иш олиб борилмоқда.
2022 йилнинг 1—20 январь кунлари Call-марказга жами 14 112 та мурожаат келиб тушган. Янги йилнинг дастлабки 5 кунида ўртача мурожаатлар сони 300-400 тани ташкил этган бўлса, навбатдаги 5 кунда кетма-кет ўсиш кузатилиб, 478 тадан 761 тагача етган. Шундай қилиб, 1—10 январь кунлари Call-марказ диспетчерлари 4512 та мурожаатни қабул қилган.
Январь ойининг иккинчи ўн кунлигидан бошлаб эса бу кўрсаткичлар сезиларли даражада ошиб, мурожаатлар сони кунига ўртача 900-1000 тага етган. Натижада ойнинг иккинчи ўн кунлигида жами 9600 та мурожаат келиб тушган. Бу 1—10 январь кунларидаги кўрсаткичга қиёслаганда 2 баробардан ортиқдир.
Таҳлилларнинг кўрсатишича, Call-марказга қўнғироқ қилувчиларнинг катта қисми коронавируснинг янги штамми белгилари, уни даволаш йўлларига оид саволлар билан мурожаат этмоқда.
Эслатиб ўтамиз, Ўзбекистонда коронавируснинг омикрон штамми 7 январь куни аниқланганди. Шундан буён коронавирусга чалинганлар сони орта бошлади. Хусусан, 22 январь куни 1478 кишида касаллик тасдиқланиб, кунлик касалланишлар сони бўйича қаторасига бешинчи кун антирекорд қайд этилди. Мамлакатда пандемия бошидан бери коронавирусга чалингани расман тасдиқланганлар сони эса 213 767 нафарга етди.
Изоҳ (0)