2021-yilda Samarqand viloyatining tashqi savdo aylanmasi 1,755 milliard dollarini tashkil etgan. Shundan 450,2 million dollar eksportdan, 1,3 milliard dollari esa importdan kelib tushgan. Bu haqda viloyat bojxona boshqarmasi boshlig‘i o‘rinbosari, bojxona xizmati podpolkovnigi Jasurbek Fayzullayev bilan bo‘lib o‘tgan matbuot anjumanida ma’lum qilindi, deb xaba beradi “Daryo” muxbiri.
Ma’lum qilinishicha, 2021-yil davomida import qilingan tovarlarga qonunchilikda belgilangan stavkalar asosida jami 3,593 trillion so‘m bojxona to‘lovlari hisoblangan. Shuningdek, 1,710 trillion so‘m qismiga bojxona to‘lovlaridan imtiyozlar berilgan, qolgan 1,882 trillion so‘mi davlat budjetiga undirilgan.
Jasurbek Fayzullayevning ta’kidlashicha, 2021-yilda Samarqand viloyati bojxona boshqarmasi xodimlari tomonidan 734 ta bojxona qonun buzilishi holatlari aniqlangan. Ular bo‘yicha 15 milliard so‘mdan ortiq tovar moddiy boyliklar ashyoviy dalil tariqasida olib qo‘yilgan.
Boshqarma tomonidan giyohvandlik vositalari bilan bog‘liq 49 ta qonunbuzilish holatlarini aniqlangan. Natijada 34,4 kilogramm giyohvandlik vositalarini noqonuniy muomalasiga chek qo‘yilgan.
Avvalroq Toshkentda tamakini O‘zbekiston hududi orqali o‘tkazish uchun tadbirkordan 19 ming dollar talab qilgan shaxslar ushlangani, Farg‘onada 14,5 tonna go‘shtni ko‘mir ostiga yashirib, Tojikistonga olib o‘tishga uringan shaxslar aniqlangani, Namanganda 2300 kg pistani Qirg‘izistondan olib kirib berish uchun 700 dollar pora olgan IIB xodimi ishdan olingani to‘g‘risida xabar berilgandi.
Izoh (0)