Andijon viloyatining Qo‘rg‘ontepa tumanida o‘zganing uyiga o‘g‘irlikka tushib, xonadon egasining pullarini o‘margan shaxslar ushlandi, deb xabar beradi Tergov departamenti.
Ma’lum qilinishicha,16-yanvar kuni soat 11:00 larda voyaga yetmaganlar — 16 yoshli Yu.X. va 15 yoshli N.A. tumanning Iftixor ko‘chasida yashovchi 25 yoshli M.F.ning yashash xonadoniga darvozasi ochiqligidan foydalanib, g‘ayriqonuniy ravishda kirgan.
Ular xonadon yotoqxonasidagi shkaf ichida bo‘lgan 2,5 ming dollar va 8,57 million so‘m pullarni yashirin ravishda o‘g‘irlab, hodisa joyidan yashirinayotgan vaqtida ushbu manzilda xizmat olib borayotgan Qo‘rg‘ontepa tumani IIB HPB profilaktika inspektori tomonidan ushlangan. Yigitlardan ashyoviy dalil tariqasida pullar rasmiylashtirib olingan.
Mazkur holat yuzasidan Qo‘rg‘ontepa tuman IIB huzuridagi tergov guruhi tomonidan voyaga yetmaganlar Yu.X. va N.A.ga nisbatan Jinoyat kodeksining 169-moddasi 2-qismi “b,v,g” bandlari (o‘g‘irlik) bilan jinoyat ishi qo‘zg‘atilgan. Hozirda tergov harakatlari davom etmoqda.
Avvalroq Buxoroda 8-sinf o‘quvchisi qo‘shnisining qariyb 5 mln so‘mlik buyumlarini o‘g‘irlagani, Toshkentdagi bozordan 280 ming so‘mlik buyumlarni o‘g‘irlagan to‘rt ayol qo‘lga olingani, Namanganda 15 yoshli qizlar o‘zganing kir mashinasini jabrlanuvchining uyidayoq sotib yuborgani to‘g‘risida xabar berilgandi.
Izoh (0)