O‘zbekistonda ichimlik suvini zararsizlantiruvchi portativ qurilma ixtiro qilindi

O‘zbekiston Fanlar akademiyasi Yadro fizikasi instituti tomonidan ichimlik suvini zararsizlantirish uchun portativ qurilma yaratildi.

Ushbu qurilma ichimlik suvi manbasining ifloslanish xavfi mavjud bo‘lgan sharoitlarda — dalada, lagerda, turli xizmat safarlarida ichimlik suvini zararsizlantirish uchun mo‘ljallangan.

Qurilmaning ishlashi metall ionlarining suvga elektrolizi ta’siriga asoslangan bo‘lib, ular keng ko‘lamli patogen mikroorganizmlarni (jumladan, dizenteriya, vabo, tif va boshqalar patogenlarini) yo‘q qiladi.

“Qurilmaning o‘ziga xos xususiyati shundaki, ichimlik suvi standartlariga javob beradigan metallarning past konsentratsiyasida kengroq bakteriyalarga qarshi yuqori biotsid faollikni ta’minlaydigan o‘ziga xos tri-metall qotishmasidan foydalanishdir. Tozalangan suv 12 oy davomida iste’mol qilish uchun xavfsizdir”, — deyiladi xabarda.

Avvalroq YeTTB Namangan viloyatida ichimlik suvi ta’minotini yaxshilashga 70 million dollar ajratishi, O‘zbekistonda aholining suvdan qarzdorligi 555,8 milliard so‘mga yetgani to‘g‘risida xabar berilgandi.