2021 йилда Самарқанд вилоятининг ташқи савдо айланмаси 1,755 миллиард долларини ташкил этган. Шундан 450,2 миллион доллар экспортдан, 1,3 миллиард доллари эса импортдан келиб тушган. Бу ҳақда вилоят божхона бошқармаси бошлиғи ўринбосари, божхона хизмати подполковниги Жасурбек Файзуллаев билан бўлиб ўтган матбуот анжуманида маълум қилинди, деб хаба беради «Дарё» мухбири.
Маълум қилинишича, 2021 йил давомида импорт қилинган товарларга қонунчиликда белгиланган ставкалар асосида жами 3,593 триллион сўм божхона тўловлари ҳисобланган. Шунингдек, 1,710 триллион сўм қисмига божхона тўловларидан имтиёзлар берилган, қолган 1,882 триллион сўми давлат бюджетига ундирилган.
Жасурбек Файзуллаевнинг таъкидлашича, 2021 йилда Самарқанд вилояти божхона бошқармаси ходимлари томонидан 734 та божхона қонун бузилиши ҳолатлари аниқланган. Улар бўйича 15 миллиард сўмдан ортиқ товар моддий бойликлар ашёвий далил тариқасида олиб қўйилган.
Бошқарма томонидан гиёҳвандлик воситалари билан боғлиқ 49 та қонунбузилиш ҳолатларини аниқланган. Натижада 34,4 килограмм гиёҳвандлик воситаларини ноқонуний муомаласига чек қўйилган.
Аввалроқ Тошкентда тамакини Ўзбекистон ҳудуди орқали ўтказиш учун тадбиркордан 19 минг доллар талаб қилган шахслар ушлангани, Фарғонада 14,5 тонна гўштни кўмир остига яшириб, Тожикистонга олиб ўтишга уринган шахслар аниқлангани, Наманганда 2300 кг пистани Қирғизистондан олиб кириб бериш учун 700 доллар пора олган ИИБ ходими ишдан олингани тўғрисида хабар берилганди.
Изоҳ (0)