Qoraqalpog‘istonda qirg‘ovullarni ovlash taqiqlandi, deb xabar bermoqda O‘zA.
Qayd etilishicha, Qoraqalpog‘iston Ekologiya va atrof-muhitni muhofaza qilish qo‘mitasining tavsiyasiga asosan Vazirlar Kengashining 13-yanvardagi “Respublikada qirg‘ovullarni muhofaza qilish va sonini ko‘paytirish chora-tadbirlari to‘g‘risida”gi qarori qabul qilingan. Unga ko‘ra, 2022—2023-yillarda qirg‘ovullarni ovlash taqiqlangan.
Mazkur qaror bilan qo‘mitaga Ichki ishlar vazirligi bilan birgalikda qirg‘ovullarning noqonuniy ovlanishining oldini olish bo‘yicha ishlarni faollashtirish, qirg‘ovullarning noqonuniy ovlanishiga yo‘l qo‘ygan shaxslarga nisbatan amaldagi qoidalarga muvofiq va belgilangan tartibda tegishli choralar ko‘rish topshirilgan.
Ekologiya va atrof-muhitni muhofaza qilish qo‘mitasi Bioxilma-xillik va muhofaza etiladigan tabiiy hududlar masalalari bo‘limi bosh mutaxassisi Alisher Yakubovning ta’kidlashicha, qirg‘ovullarni ovlash taqiqlanmagan. Masalan, o‘tgan yili ajratilgan kvota doirasida Qoraqalpog‘iston ovchilariga 1800 bosh qirg‘ovulni ovlashga ruxsatnoma berilgan.
Lekin qirg‘ovullarning bosh sonini ko‘paytirish zarurligi mutaxassislar tomonidan e’tirof etilgani bois ikki yillik taqiq o‘rnatilgan. Ikki yillik taqiq qirg‘ovullar sonining ko‘payishiga xizmat qiladi.
Eslatib o‘tamiz, qirg‘ovullarni ovlash O‘zbekistonda ham 2019—2020-yillarda man etilgandi. Qirg‘ovullarni noqonuniy ovlashga yo‘l qo‘ygan shaxslarga amaldagi qonunlar asosida va belgilangan tartibda tegishli choralar ko‘rilishi, qarorda ko‘rsatilgan vazifalar to‘liq bajarilsa, respublikadagi qirg‘ovullarning soni 3—4 barobar ko‘payishi aytilgandi.
Izoh (0)