Shavkat Mirziyoyev “Gidrometeorologiya faoliyati to‘g‘risida”gi qonunni imzoladi, deb xabar beradi Telegram’dagi “Huquqiy axborot” kanali.
Qonun bilan gidrometeorologiya faoliyatini tartibga solish belgilangan. Gidrometeorologiya xizmati ushbu faoliyatdagi maxsus vakolatli davlat organi hisoblanadi.
Gidrometeorologik axborot (atrof tabiiy muhit holatining kuzatuvlari natijalari) ochiq va ishonchli bo‘lishi kerak.
Gidrometeorologiya xizmati davlat organlarini, jismoniy va yuridik shaxslarni iqlim o‘zgarishi, atrof tabiiy muhitning ifloslanish darajasi to‘g‘risidagi axborot bilan ta’minlaydi. Bunda umumiy gidrometeorologik va tezkor gidrometeorologik axborotlar Gidrometeorologiya xizmatining rasmiy veb-saytiga va Ochiq ma’lumotlar portaliga joylashtiriladi.
Qonun rasman e’lon qilingan kundan boshlab kuchga kiradi.
Eslatib o‘tamiz, 2020-yil noyabr oyining boshlarida O‘zbekiston Gidrometeorologiya xizmati samarali faoliyat yuritish uchun xodimlarning oylik maoshlari kamligi va malakali kadrlar ketib qolishi kabi masalalarni zudlik bilan hal etish lozimligini ma’lum qilgandi. Shu kuni prezident Shavkat Mirziyoyev mamlakatda gidrometeorologiya xizmati faoliyatini takomillashtirish bo‘yicha ustuvor vazifalar muhokamasi yuzasidan yig‘ilish o‘tkazgandi.
Izoh (0)