Toshkent shahrida joylashgan “Samarqand darvoza” savdo majmuasi oldida 1-yanvar kuni fuqarolar Yangi yilni nishonlash maqsadida qo‘lbola “ognetushitel” portlatgani, oqibatda holatni videoga olayotgan 3 kishi jarohatlangani xabar qilingandi. Ichki ishlar vaziri matbuot kotibi holat yuzasidan olib borilayotgan tergov jarayonidan lavhalarni e’lon qildi.
Eslatib o‘tamiz, portlash 1-yanvar kuni soat 00:45 atrofida Shayxontohur tumani Qoratosh ko‘chasida sodir bo‘lgan. Bayram bahona yig‘ilgan bir nechta fuqarolar avtoyo‘lni ajratib turuvchi to‘siqqa mushakbozlik qilish maqsadida qo‘lbola usulda yasalgan o‘t o‘chirish moslamasini joylashtirgan. Tagidan olov yoqilishi oqibatida moslama portlab, bo‘laklarga bo‘linib ketgan.
Qayd etilishicha, avvalgi yillarda ham shunday o‘t o‘chirgichlarda sinab ko‘rilgan portlashlarni internet orqali ko‘rgan yigit yangiyo‘llik tanishi bilan bog‘lanib, shunaqa moslama topib berishini so‘ragan.
“Bunaqa darajada bang‘illaydi deb kutmagandik. Juda vahimali bo‘ldi. Ognetushitel yasash bo‘yicha video ko‘rgandim. Yangiyo‘llik bolalar yasagani haqida. O‘sha videoni yangiyo‘llik og‘aynimga tashaganimda u ‘bu narsa bizda yasalgan’ deb aytdi. U narsa pulli ekan. Aslida, 500 ming so‘m berishimiz kerak edi, lekin 470 ming berdik”, — degan portlatilgan qo‘lbola moslamani sotib olgan o‘spirin.
Aniqlanishicha, moslamani tayyorlash uchun turli kimyoviy moddalar va yengil avtomobilning ehtiyot qismlaridan foydalanilgan. Bu usulni bir necha yildan beri qo‘llab kelayotgan traktor haydovchisi yoshlarga uni qanday tayyorlashni o‘rgatgan:
“Pul taklif qildi. 80 ming so‘m beraman, dedi. Qo‘ygin, mana ol, olib ketaver desam, keyin 80 ming tashlab ketibdi”.
Hodisa tashkilotchilaridan biri holat sodir bo‘lgan voqealarni so‘zlab bergan:
“Mashinalar orasidan o‘tib, yo‘lning o‘rtasidagi bordyorga qo‘ydik. Men o‘zim yoqdim. Yoqqanimdan keyin 10 sekundmi, 15 sekunddan keyin portladi. Voqea joyida 2 daqiqacha turganimdan keyin u yerdan ketdim. Uyga borib, telefonimni o‘ynab o‘tirsam, ikki bola jarohatlangani haqida video kelib qoldi”.
Ichki ishlar vazirligi bergan ma’lumotga ko‘ra, portlash oqibatida M.S. (1997-yilda tug‘ilgan) qorin yumshoq to‘qimalari lat yeyishi, M.A. (1999-yilda tug‘ilgan) o‘ng oyoq boldir, tovon sohalari yirtilgan jarohati hamda X.N. (2006-yilda tug‘ilgan) o‘ng oyoq panja qismi yirtilgan, majaqlangan jarohati, oyoq barmoqlari noto‘liq amputatsiyasi tashxisi bilan turli ko‘rinishdagi tan jarohati olgan.
2006-yilda tug‘ilgan bemorga shoshilinch ravishda o‘ng oyoq panjasining to‘rtta barmog‘ini replantatsiya qilish, ya’ni uzilib ketgan barmoqlarni ulash operatsiyasi bajarilgan. Hozirgi vaqtda bemor mikroxirurgiya bo‘limida statsionar davo olmoqda. Portlash oqibatida jabrlangan ikki bolaning ahvoli qoniqarli ekani bois ularga uy sharoitida muolaja olishga ruxsat berilgan.
“Yo‘lning o‘rtasiga odamlar ko‘p bo‘lib yig‘ildi. Ognetushitel qo‘yishdi. Kim qo‘yganini ko‘rmadim odam ko‘p bo‘lganidan. Odam tarqalgandan keyin qarasam, ognetushitel ekan. Men odamlar to‘planib turgan paytda salyut qo‘yishyapti deb o‘ylagandim. Portlash zarbasi ‘udar’ bilan keldi, boshida hech narsani sezmadim. Yonimdagi odam oyog‘im qonaganini aytib qoldi. Keyin o‘sha yerdagi akalar ko‘tarib mashinaga o‘tirg‘izishdi-da, shifoxonaga olib kelishdi”, — deydi jabrlanuvchi.
Olib borilayotgan tergov-tezkor harakatlari davomida mazkur hodisaga aloqador bo‘lgan 13 nafar shaxsga nisbatan ayblov e’lon qilinib, Jinoyat protsessual kodeksining 221-moddasi tartibida qamoqqa olish tarzidagi ehtiyot chorasi qo‘llangan. 5 nafari ma’muriy tartibda qamoqqa olingan, yana 5 nafari ma’muriy jarimaga tortilgan.
Aybdorlarga nisbatan Jinoyat kodeksining 250-moddasi “b” (portlash xavfi bo‘lgan moddalar yoki pirotexnika buyumlaridan foydalanish qoidalarini buzish) bandi bilan jinoyat ishi qo‘zg‘atilgan. Mazkur moddaga asosan aybdor shaxslar 3 yildan 5 yilgacha bo‘lgan muddatga ozodlikdan mahrum qilinishi mumkin.
Eslatib o‘tamiz, 1-yanvar kuni Sirdaryo viloyatida ham shunga o‘xshash holat sodir bo‘lgan. Sirdaryo tumani “Do‘stlik” mahallasida yashovchi fuqaro (2003-yilda tug‘ilgan) o‘t o‘chirish moslamasi portlatgani uchun 15 sutkaga qamalgan.
Izoh (0)