Тошкент шаҳрида жойлашган «Самарқанд дарвоза» савдо мажмуаси олдида 1 январь куни фуқаролар Янги йилни нишонлаш мақсадида қўлбола «огнетушитель» портлатгани, оқибатда ҳолатни видеога олаётган 3 киши жароҳатлангани хабар қилинганди. Ички ишлар вазири матбуот котиби ҳолат юзасидан олиб борилаётган тергов жараёнидан лавҳаларни эълон қилди.
Эслатиб ўтамиз, портлаш 1 январь куни соат 00:45 атрофида Шайхонтоҳур тумани Қоратош кўчасида содир бўлган. Байрам баҳона йиғилган бир нечта фуқаролар автойўлни ажратиб турувчи тўсиққа мушакбозлик қилиш мақсадида қўлбола усулда ясалган ўт ўчириш мосламасини жойлаштирган. Тагидан олов ёқилиши оқибатида мослама портлаб, бўлакларга бўлиниб кетган.
Қайд этилишича, аввалги йилларда ҳам шундай ўт ўчиргичларда синаб кўрилган портлашларни интернет орқали кўрган йигит янгийўллик таниши билан боғланиб, шунақа мослама топиб беришини сўраган.
«Бунақа даражада банғиллайди деб кутмагандик. Жуда ваҳимали бўлди. Огнетушитель ясаш бўйича видео кўргандим. Янгийўллик болалар ясагани ҳақида. Ўша видеони янгийўллик оғайнимга ташаганимда у ‘бу нарса бизда ясалган’ деб айтди. У нарса пулли экан. Аслида, 500 минг сўм беришимиз керак эди, лекин 470 минг бердик», — деган портлатилган қўлбола мосламани сотиб олган ўспирин.
Аниқланишича, мосламани тайёрлаш учун турли кимёвий моддалар ва енгил автомобилнинг эҳтиёт қисмларидан фойдаланилган. Бу усулни бир неча йилдан бери қўллаб келаётган трактор ҳайдовчиси ёшларга уни қандай тайёрлашни ўргатган:
«Пул таклиф қилди. 80 минг сўм бераман, деди. Қўйгин, мана ол, олиб кетавер десам, кейин 80 минг ташлаб кетибди».
Ҳодиса ташкилотчиларидан бири ҳолат содир бўлган воқеаларни сўзлаб берган:
«Машиналар орасидан ўтиб, йўлнинг ўртасидаги бордёрга қўйдик. Мен ўзим ёқдим. Ёққанимдан кейин 10 секундми, 15 секунддан кейин портлади. Воқеа жойида 2 дақиқача турганимдан кейин у ердан кетдим. Уйга бориб, телефонимни ўйнаб ўтирсам, икки бола жароҳатлангани ҳақида видео келиб қолди».
Ички ишлар вазирлиги берган маълумотга кўра, портлаш оқибатида М.С. (1997 йилда туғилган) қорин юмшоқ тўқималари лат ейиши, М.А. (1999 йилда туғилган) ўнг оёқ болдир, товон соҳалари йиртилган жароҳати ҳамда Х.Н. (2006 йилда туғилган) ўнг оёқ панжа қисми йиртилган, мажақланган жароҳати, оёқ бармоқлари нотўлиқ ампутацияси ташхиси билан турли кўринишдаги тан жароҳати олган.
2006 йилда туғилган беморга шошилинч равишда ўнг оёқ панжасининг тўртта бармоғини реплантация қилиш, яъни узилиб кетган бармоқларни улаш операцияси бажарилган. Ҳозирги вақтда бемор микрохирургия бўлимида стационар даво олмоқда. Портлаш оқибатида жабрланган икки боланинг аҳволи қониқарли экани боис уларга уй шароитида муолажа олишга рухсат берилган.
«Йўлнинг ўртасига одамлар кўп бўлиб йиғилди. Огнетушитель қўйишди. Ким қўйганини кўрмадим одам кўп бўлганидан. Одам тарқалгандан кейин қарасам, огнетушитель экан. Мен одамлар тўпланиб турган пайтда салют қўйишяпти деб ўйлагандим. Портлаш зарбаси ‘удар’ билан келди, бошида ҳеч нарсани сезмадим. Ёнимдаги одам оёғим қонаганини айтиб қолди. Кейин ўша ердаги акалар кўтариб машинага ўтирғизишди-да, шифохонага олиб келишди», — дейди жабрланувчи.
Олиб борилаётган тергов-тезкор ҳаракатлари давомида мазкур ҳодисага алоқадор бўлган 13 нафар шахсга нисбатан айблов эълон қилиниб, Жиноят процессуал кодексининг 221-моддаси тартибида қамоққа олиш тарзидаги эҳтиёт чораси қўлланган. 5 нафари маъмурий тартибда қамоққа олинган, яна 5 нафари маъмурий жаримага тортилган.
Айбдорларга нисбатан Жиноят кодексининг 250-моддаси «б» (портлаш хавфи бўлган моддалар ёки пиротехника буюмларидан фойдаланиш қоидаларини бузиш) банди билан жиноят иши қўзғатилган. Мазкур моддага асосан айбдор шахслар 3 йилдан 5 йилгача бўлган муддатга озодликдан маҳрум қилиниши мумкин.
Эслатиб ўтамиз, 1 январь куни Сирдарё вилоятида ҳам шунга ўхшаш ҳолат содир бўлган. Сирдарё тумани «Дўстлик» маҳалласида яшовчи фуқаро (2003 йилда туғилган) ўт ўчириш мосламаси портлатгани учун 15 суткага қамалган.
Изоҳ (0)