Namangan shahridan Rossiyaning 8 ta shahriga 30-yanvardan boshlab to‘g‘ridan to‘g‘ri aviaqatnovlar amalga oshiriladi. Bu haqda Uzbekistan Airways xabar qildi.
Ma’lum qilinishicha, parvozlar Uzbekistan Airways Express havo kemalarida to‘liq ekonom formatida tashkil etiladi. Samolyotlar Rossiyaning Moskva, Perm, Samara, Omsk, Orenburg, Irkutsk, Krasnodar va Yekaterinburg shaharlariga qatnovlarni amalga oshiradi.
30-yanvar kuni Uzbekistan Airways Airbus 320 havo kemasida to‘g‘ridan to‘g‘ri Namangandan Permga ilk aviaqatnovni uyushtiradi. Namangan—Perm yo‘nalishi uchun chiptalarni 1 million 656 ming 217 so‘mdan boshlab xarid qilish mumkin.
Avvalroq Uzbekistan Airways Farg‘ona vodiysi shaharlaridan talab yuqori bo‘lgan yo‘nalishlar bo‘yicha parvozlar amalga oshirish uchun “Sharqiy” xab tashkil etishi xabar qilingandi. Unga ko‘ra, 2022-yilning 31-yanvaridan boshlab Uzbekistan Airways Express havo kemalarida Full Economy (to‘liq iqtisodiy sinf) tamoyili asosida Namangandan Rossiyaning 8 ta shahriga to‘g‘ridan to‘g‘ri muntazam aviaqatnovlarni amalga oshirish boshlanadi. Talab oshgani sayin Namangandan yo‘nalish tarmog‘ini kengaytirish ham ko‘rib chiqiladi.
Izoh (0)