O‘zbekiston Transport vazirligining past rentabelli davlat korxonalari xususiy sektorga o‘tkaziladi

Vazirlar Mahkamasining 02.01.2022-yildagi 2022-yil 2-yanvardagi “Avtomobil transporti sohasida davlat ishtirokidagi korxonalarga xususiy sektorni jalb qilish to‘g‘risida”gi qarori qabul qilindi, deb xabar beradi Norma.

Hujjat bilan Transport vazirligining avtomobil transporti sohasidagi past rentabelli davlat korxonalarini xususiy sektorga investitsiya va ijtimoiy majburiyatlarni qabul qilish sharti bilan ommaviy auksionlar orqali sotish nazarda tutilmoqda.

Shuningdek, “Elektron auksion” elektron savdo maydonida sotiladigan korxonalar ro‘yxati tasdiqlangan, ular uchun quyidagi investitsiya va ijtimoiy majburiyatlar belgilangan:

• ish faoliyatini kamida 5 yil davomida jamoat transporti sohasida amalga oshirish hamda birinchi navbatda qishloq hududlarini tuman va viloyat markazlari bilan bog‘lovchi yo‘nalishlarda faoliyat yuritish;
• bir yil muddatda ish faoliyatiga zamonaviy axborot-kommunikatsiya texnologiyalarini (GPS qurilmalari, elektron to‘lov tizimlari) joriy etish.

Davlat aktivlarini boshqarish agentligiga investorlar bilan tegishli shartnoma tuzilishini hamda qabul qilingan investitsiya va ijtimoiy majburiyatlar bajarilishini nazorat qilishni ta’minlash topshirilgan.

Hujjat qonun hujjatlari ma’lumotlari milliy bazasida e’lon qilingan va 2022-yil 3-yanvardan kuchga kirgan.

Avvalroq 2022-yilning noyabriga qadar eksklyuziv huquqlarni bekor qilish va davlat ishtirokidagi kompaniyalarni xususiylashtirish hisobiga 14 ta faoliyat turi bo‘yicha monopoliyalar tugatilishi (aholi va ijtimoiy soha obyektlariga suyultirilgan gaz yetkazib berish, rangli metall parchalari va chiqindilarini tayyorlash, sertifikatlashtirish xizmatlari va boshqalar) to‘g‘risida xabar berilgandi.