Dunyoda koronavirusga chalinganlar soni 300 milliondan oshdi

Amerikaning Jons Hopkins universiteti ma’lumotlariga ko‘ra, dunyoda koronavirusga chalinganlar soni 300  milliondan oshdi.

7-yanvar holatiga ko‘ra, pandemiya boshidan beri butun dunyoda 300 million 95 ming 481 kishi COVID-19 bilan kasallangan. Shu bilan birga, Jahon sog‘liqni saqlash tashkiloti (JSST) hozirgacha 296 million kishida infeksiya qayd etilgani haqida xabar bermoqda.

AQSh kasallanganlar soni bo‘yicha yetakchi bo‘lib qolmoqda — universitet ma’lumotlariga ko‘ra, mamlakatda 58,4 milliondan ortiq odam koronavirus bilan kasallangan. Ikkinchi o‘rinda Hindiston (35,1 million), uchinchi o‘rinda Braziliya (22,32 million) turibdi. Shuningdek, yuqori beshlikdan Buyuk Britaniya (14,1 million) va Fransiya (11,2 million) ham joy olgan.

Pandemiya boshlanganidan buyon dunyoda 5,47 million kishi koronavirus oqibatida vafot etgan. Shu bilan birga, odamlarni emlash uchun 9,3 milliard dozada koronavirusga qarshi vaksina ishlatilgan, deyiladi Jons Hopkins ma’lumotlarida.

JSST o‘tgan bir kecha-kunduzda dunyo bo‘ylab rekord darajada ko‘p odamda koronavirus aniqlangani haqida xabar berdi. Unga ko‘ra, bir sutkada 2,6 milliondan ortiq kishi infeksiyaga chalingan.

JSST texnik guruhi rahbari Mariya van Kerkxovening ma’lum qilishicha, dunyo bo‘ylab COVID-19 bilan kasallanishning yangi holatlari o‘tgan haftada 71 foizga oshgan. Uning so‘zlariga ko‘ra, bu ko‘rsatkich mintaqaga qarab farq qiladi. “Amerikada bu 100 foizga, Afrikada esa 7 foizga oshgan”, — deydi van Kerxkove.