Braziliya va Boliviyada sodir bo‘lgan suv toshqinlari oqibatida kamida 30 kishi halok bo‘ldi, deb xabar beradi “Korrespondent.net”.

CNN telekanali ma’lumotlariga ko‘ra, Braziliya shimoli-sharqida kuzatilgan suv toshqinlari Baiya shtatidagi 40 ga yaqin aholi punktini qamrab olgan, 18 kishi halok bo‘lgan va 280 dan ortiq odam jarohat olgan.

“Bu ulkan fojia. Baiyaning yangi tarixida bu qadar halokatli voqea sodir bo‘lganini eslay olmayman. Bu rostdan ham qo‘rqinchli, ko‘plab bino va ko‘chalar to‘liq suv ostida qoldi”, — deydi shtat gubernatori Ruy Koshta.

Ta’kidlanishicha, 35 mingdan ortiq odam o‘z uylarini tark etishga majbur bo‘lgan. Itambi shahrida kuzatilgan kuchli yog‘ingarchilik to‘g‘on yorilishiga olib kelgan, bu esa vaziyatni yanada yomonlashtirishi mumkin.

Braziliya meteorologiya xizmatlari yangi suv toshqinlari va ko‘chkilar xavfidan ogohlantirmoqda, chunki yog‘ingarchilik yana bir sutkadan ortiq davom etishi mumkinligi aytilmoqda.

“400 dan ortiq uyga zarar yetdi, ularning 80 tasi qayta tiklanishga yaroqsiz. Va bizda 13 kishi halok bo‘lgani haqida ma’lumot bor”, — deydi mamlakat mudofaa vaziri o‘rinbosari Xuan Karlos Kalvimontes.

Davomli yog‘ingarchilik oqibatida mamlakatdagi to‘qqizta departamentning yettitasi zarar ko‘rgan. “Santa-Krusda vaziyat haqiqatan juda og‘ir”, — deya ta’kidlagan u.

Suv toshqinlari oqibatida kamida 1000 ta oila zarar ko‘rgan. Bir nechta aholi punktlarida evakuatsiya ishlari amalga oshirilyapti.

Eslatib o‘tamiz, dekabr o‘rtalarida Braziliyada yuz bergan suv toshqini tufayli 7 kishi halok bo‘lgan, minglab odamlar evakuatsiya qilingandi. O‘shanda Braziliya prezidenti va Baxiya shtati gubernatori zarar ko‘rgan hududlarga tashrif buyurdi va ularni qayta tiklash uchun moliyaviy yordam ko‘rsatishga va’da bergan edi.