Qirg‘iziston chegara xizmati Tojikiston bilan chegaradagi keskinlik tufayli xizmatning kuchaytirilgan rejimiga o‘tdi: qo‘shni davlat fuqarolari qirg‘izistonliklarning avtomobillarini toshbo‘ron qilgan, bunga javoban qirg‘iz chegarachisi havoga o‘q uzgan, deb yozmoqda “RIA Novosti” chegara boshqarmasi matbuot xizmatiga tayanib.
Qirg‘iziston chegarachilari ma’lum qilishicha, 25-dekabr kuni Qirg‘izistonning Damba va Maqsat qishloqlari to‘g‘risidagi chegara yaqinida tojikistonlik harbiylarning to‘planishi qayd etilgan, chegara postlaridan birida esa tojik harbiylari minomyot o‘rnatgan. Oradan ko‘p o‘tmay, Eki-Toshdagi chegara hududida otishma sodir bo‘lgan: tojik fuqarolari qirg‘izistonliklarning avtomobillarini toshbo‘ron qilgan, mojaroni to‘xtatish uchun qirg‘iz chegarachisi havoga o‘q uzishga majbur bo‘lgan, deya xabar berdi, Qirg‘iziston chegara boshqarmasi.
“Eki-Tosh hududida sodir bo‘lgan voqeadan so‘ng darhol Qirg‘iziston va Tojikiston chegara postlari boshliqlari o‘rtasida uchrashuv bo‘lib o‘tdi, ular vaziyatni barqarorlashtirish maqsadida qo‘shimcha chegara posbonlarini joylashtirdi. Tojikiston tomoni hodisaga aloqador shaxslarni qidirayotganini ma’lum qildi. Davlat chegarasining ushbu qismida joylashtirilgan Qirg‘iziston chegara xizmati bo‘linmalari kuchaytirilgan xizmat ko‘rsatish rejimiga o‘tkazildi”, — dedi boshqarma matbuot kotibi.
Ta’kidlanishicha, hozirda chegaradagi vaziyat “nisbatan barqaror”. “Qirg‘iziston Respublikasi Milliy xavfsizlik davlat qo‘mitasi chegara xizmati mazkur uchastkadagi vaziyatni nazoratga olgan va kuzatib bormoqda”, — deya ta’kidlanadi boshqarma xabarida.
Qirg‘iziston va Tojikiston chegarasida vaqti-vaqti bilan mahalliy aholi va ikki davlat chegarachilari o‘rtasida to‘qnashuvlar yuz beradi. Bunga chegaradagi bahsli va tavsiflanmagan hududlar sabab bo‘ladi.
Aprel oyi oxirida Qirg‘iziston va Tojikistonning chegaraoldi viloyatlari aholisi o‘rtasidagi ziddiyat ikki mamlakat harbiylarining qurolli to‘qnashuviga aylanib ketgandi. Qirg‘iz-tojik chegarasidagi nizolarda Qirg‘izistonning 36 fuqarosi halok bo‘ldi, 200 ga yaqin kishi jarohat oldi. Tojikiston esa 19 kishi halok bo‘lgani, 87 kishi jabrlangani haqida xabar berdi. Mojaroda 300 dan ortiq uylar va infratuzilma obyektlari vayron qilingan, ayrimlari yonib ketgan. 29-aprel oqshomida tomonlar nizoni to‘xtatish va chegaradan harbiy kuchlarni olib ketish to‘g‘risida kelishib oldi, ammo ertasi kuni yana otishma boshlandi. 30-aprel kuni tushdan keyin navbatdagi sulhga erishildi. 3-may kuni Qirg‘iziston va Tojikiston o‘z harbiy kuchlarini chegara chizig‘idan olib chiqishni yakunladi.
Iyul oyida ikki mamlakat chegarachilari o‘rtasida otishma yuz bergandi, hodisada qirg‘iz harbiy xizmatchisi halok bo‘lgan.
Izoh (0)