Avstraliyada yirik suv toshqini oqibatida Kvinslend shtatini suv bosdi. Ikki kishi halok bo‘lgan, mingga yaqin kishi uylarini tashlab ketgan. Tabiiy ofat Kvinslend, Yangi Janubiy Uels va Viktoriya shtatlarida vayronagarchilikka sabab bo‘lgan, deb yozadi “Korrespondent.net”.
Yangi Janubiy Uelsda favqulodda xizmatlarga bir sutkada 129 ta yordamga chaqiruv qo‘ng‘irogi kelib tushgan. 300 dan ortiq ko‘ngillilar suv toshqini oqibatlarini bartaraf etish, odamlarni qutqarish va zarur vositalarni yetkazib berishda ishtirok etmoqda.
Kvinslend shtatida joylashgan Tuvumba shahri shimolidagi Okey Krik aholi punktida 1-dekabr kuni 73 yoshli erkak suvga cho‘kib ketgan. Markaziy Kvinslenddagi Rokxempton shahrining g‘arbiy qismida suv bosgan uydan yana bir erkakning jasadi topilgan.
Noyabr boshida ham Avstraliyada kuchli yomg‘ir yog‘ishi ortidan yirik suv toshqinlari yuzaga kelgandi. Toshqinda daraxtga ilinib qolgan erkak 6 soat ichida xavfsiz joyga olib o‘tilgani xabar qilingan.
Noyabr oxirida esa Ispaniyadagi bir qator shaharlarda kuchli qor yog‘ishi tufayli suv toshqini yuz bergandi. Bilbao shahrida elektr energiyasi bilan bog‘liq muammolar boshlangan. Ko‘chalarda to‘xtab qolgan mashinalar butunlay suvga botgan.
Avvalroq Xitoy shimolidagi Shansi provinsiyasida bir hafta tinmagan kuchli yomg‘ir keng ko‘lamli suv toshqinlarini keltirib chiqargandi. Oqibatda mintaqadagi 1 million 760 ming kishini evakuatsiya qilishga to‘g‘ri kelgan. Shuningdek, Londonda kuchli yomg‘ir yog‘ib, oqibatda suv toshqini yuz bergani va bir nechta metro liniyalari yopilgani haqida xabar berilgandi.
Izoh (0)