NATO bosh kotibi Yens Stoltenberg 12-yanvar kuni NATO—Rossiya kengashining yig‘ilishini o‘tkazishga qaror qildi. Bu haqda NATOdagi manbasiga tayanib, Anadolu agentligi xabar berdi.
Stoltenberg ushbu qarorni NATO—Rossiya kengashining raisi sifatida qabul qilgan.
“Biz mazkur masala bo‘yicha Rossiya bilan aloqada bo‘lib turibmiz”, — dedi manba. Shuningdek, 12-yanvar kuni Bryusselda NATOga a’zo davlatlar Bosh shtab boshliqlarining yig‘ilishi bo‘lib o‘tadi.
Reuters agentligining Germaniya hukumatidagi manbalarga tayanib, xabar berishicha, Rossiya prezidenti ma’muriyati rahbari o‘rinbosari Dmitriy Kozak va Germaniya kanslerining tashqi siyosat bo‘yicha maslahatchisi Yens Pletner ham yanvar oyida Ukraina masalasida yuzma-yuz uchrashuv o‘tkazishga qaror qilgan.
Manbalarga ko‘ra, ikki davlat vakili bu haqda 23-dekabr kungi uzoq davom etgan telefon suhbatida kelishib olgan.
Reuters bunday uchrashuvni “kamdan-kam uchraydigan” deb atadi va so‘nggi paytlarda davlat rahbarlari o‘rtasida Ukraina muammosi bo‘yicha telefon qo‘ng‘iroqlari tez-tez amalga oshirilayotganini, biroq yuqori martabali amaldorlar o‘rtasida yuzma-yuz uchrashuvlar kamdan-kam bo‘layotganini qayd etdi.
Vashingtondan farqli o‘laroq Berlin Rossiyaning Ukrainaga bostirib kirmoqchiligiga shubha qilmoqda va keskinlikni kamaytirishga intilmoqda, dedi Germaniya hukumatidagi ikki manba Reuters agentligiga. “Germaniya tomonining maqsadi ‘normand formati’ni tezroq tiklashdir”, — dedi agentlik suhbatdoshlaridan biri.
Reuters agentligining ta’kidlashicha, Germaniyaning yangi kansleri Olaf Shols o‘z lavozimiga kirishgach, Rossiya bilan mamlakat harbiylarining g‘arbiy chegaralarda joylashuvi bo‘yicha muloqot qilish zarurligini ta’kidlagan. Shu bilan birga, u Rossiya Ukrainaga bostirib kiradigan bo‘lsa, unga qarshi sanksiyalar joriy etish g‘oyasini qo‘llab-quvvatlagan.
Dekabr oyi o‘rtalarida Shols Germaniya “normand formati”ga qaytish va uni qayta ishga tushirishni rejalashtirayotgani ma’lum qilgandi. U bu masalani Fransiya prezidenti Emmanuel Makron va Ukraina prezidenti Vladimir Zelenskiy bilan muhokama qilgan.
Kreml “normand formati”dagi muzokaralarga tayyorligini bildirgan, biroq buning uchun “umumiy tushunchani aks ettiruvchi” hujjat tayyorlash zarurligini ta’kidlagan.
Ma’lumot uchun, “Normand formati” yoki “Normand to‘rtligi” — Germaniya, Rossiya, Ukraina va Fransiya rahbarlaridan iborat guruh bo‘lib, u 2014-yilda Ukraina sharqidagi vaziyatni hal qilish uchun tuzilgan.
Mavzuga doir:
Izoh (0)