“Transchegaraviy pul o‘tkazmalarini ta’minlash bo‘yicha to‘lov tizimini tashkil etish chora-tadbirlari to‘g‘risida”gi hukumat qarori qabul qilindi. Bu haqda Telegram’dagi “Huquqiy axborot” kanali xabar berdi.
Qarorga muvofiq, xorijdan O‘zbekistonga transchegaraviy pul o‘tkazmalarini amalga oshirish maqsadida Tashqi iqtisodiy faoliyat milliy banki (“O‘zmilliybank”) negizida “Yagona transchegaraviy pul o‘tkazmalari” to‘lov tizimi tashkil etiladi.
Mazkur to‘lov tizimi bir qator apparat va dasturiy-texnik vositalarni o‘zida mujassam qilgan tizimli platforma bo‘lib, uning ishtirokchilari (kredit tashkilotlari) uchun vakillik hisob varaqlari orqali transchegaraviy o‘tkazmalar bo‘yicha hisob-kitoblarni amalga oshiradi.
“Aziya – Invest Bank” AJ (Moskva shahri) ushbu to‘lov tizimi orqali amalga oshirilgan transchegaraviy o‘tkazmalar bo‘yicha Rossiyadagi hisob-kitob banklaridan biri hisoblanadi.
Qarorga ko‘ra, Rossiyada ishlayotgan O‘zbekiston fuqarolarining ishga joylashish bo‘yicha xarajatlarini qoplash maqsadida kreditlar ajratish loyihasi ishlab chiqiladi.
Avvalroq O‘zbekistonda mehnat migrantlarining daromadini ikki tomonlama soliqqa tortmaslik belgilanayotgani, Rossiyadagi mehnat migrantlari maoshi qanchaligi to‘g‘risida xabar berilgandi.
Izoh (0)