Prezident Shavkat Mirziyoyev Uzbekistan GTL zavodi ochilish marosimida bu zavod viloyat iqtisodiyotiga qanday ta’sir qilishini aytib o‘tdi. Shuningdek, viloyatda rejalashtirilgan yirik loyihalar haqida ma’lumot berdi.
“Ushbu yangi majmualarning ishga tushishi, hech shubhasiz, Qashqadaryo viloyati iqtisodiyoti rivojiga ham sezilarli ta’sir ko‘rsatadi. Vohada sanoat ishlab chiqarish hajmi 1,4 barobarga oshadi, yalpi hududiy mahsulot esa 7 foizga o‘sadi.
Bu Qashqadaryo viloyatining umumiy eksport ko‘rsatkichini 2 barobar ko‘paytirish imkonini beradi.
Ochig‘ini aytish kerak, Qashqadaryo viloyati juda boy xomashyo resurslariga ega bo‘lishiga qaramay, ko‘p yillar davomida uning tayyor sanoat mahsuloti ishlab chiqarishdagi hissasi past bo‘lib qolayotgan edi.
Shuning uchun oxirgi yillarda viloyatda mahalliy sanoatning to‘qimachilik, qurilish materiallari, charm, elektrotexnika, oziq-ovqat kabi sohalarida qiymati qariyb 9 trillion so‘mlik 1 ming 700 taga yaqin loyiha ishga tushirildi.
Natijada so‘nggi uch yilda viloyatda tayyor sanoat mahsulotlari ishlab chiqarish hajmi 1,3 barobarga oshdi.
Kelgusi yillarda ham Qashqadaryo viloyatini barcha yo‘nalishlarda rivojlantirish bo‘yicha keng ko‘lamli rejalarni ishlab chiqqanmiz. Xususan, neft-gaz sohasida qiymati 140 million dollar bo‘lgan yana 3 ta loyiha amalga oshiriladi.
Muborak gazni qayta ishlash zavodida 135 million dollar evaziga oltingugurt olish qurilmasining quvvati tiklanadi. Energetika sohasida 1,3 milliard dollar investitsiyalar hisobidan jami 1 ming 250 megavattga teng yangi elektr energiyasi ishlab chiqarish quvvatlari barpo etiladi.
Misol uchun, G‘uzor tumanida 2025-yilda quvvati 300 megavatt bo‘lgan quyosh elektr stansiyasi foydalanishga topshiriladi. Talimarjon issiqlik elektr stansiyasida umumiy quvvati 900 megavatt bo‘lgan navbatdagi ikkita bug‘-gaz qurilmasi ishga tushiriladi. Oqsuv daryosida umumiy quvvati 24 megavatt bo‘lgan 3 ta kichik gidroelektr stansiyasi barpo etiladi.
Ushbu yangi quvvatlar yiliga 8 milliard kilovatt/soat elektr energiyasi ishlab chiqarish va 1,6 milliard kub metr tabiiy gazni tejash imkonini beradi.
Shu bilan birga, viloyat uchun “drayver” bo‘lgan mahalliy sanoat tarmoqlarida 900 ga yaqin loyiha doirasida 2,7 milliard dollarlik investitsiyalar faol jalb qilinadi.
Jumladan, Nishon, Kasbi, Mirishkor va Yakkabog‘ tumanlarida to‘qimachilik, Kitob, Qamashi, Dehqonobod va Chiroqchi tumanlarida qurilish materiallari; Mirishkor, Kitob tumanlari va Qarshi shahrida charm, elektrotexnika sanoati; Shahrisabz shahri va Qarshi tumanida mebel; Chiroqchi, Nishon va Koson tumanlarida oziq-ovqat sanoati bo‘yicha loyihalar amalga oshiriladi”, – deydi prezident.
Mavzuga doir:
- Shavkat Mirziyoyev Uzbekistan GTL zavodida 1,3 mingta mutaxassis yuqori daromadli, doimiy ish o‘rniga ega bo‘lishini ma’lum qildi
- “Zavodda ishlab chiqariladigan mahsulotlar jahondagi eng yuqori ekologik talablar, norma va standartlarga to‘liq javob beradi” — Shavkat Mirziyoyev Uzbekistan GTL haqida
- “GTL zavodida innovatsion yechim: o‘zini o‘zi elektr energiyasi bilan ta’minlaydi” – Shavkat Mirziyoyev
Izoh (0)