Qashqadaryo viloyatining Qarshi shahridagi markaziy dehqon oziq-ovqat bozori bozorqo‘mi O.P. 900 ming so‘m pul bilan qo‘lga tushgani xabar berildi. “Daryo” so‘roviga javob bergan viloyat IIB mas’ullari xabarni tasdiqladi.
“Daryo” muxbiri bilan suhbatlashgan bozor ishchisi Husan Mirzayevning ma’lumot berishicha, uning viloyat IIBga qilgan murojaatiga ko‘ra, 2021-yilning 18-dekabr kuni tezkor tadbir o‘tkazilgan.
“Bozorqo‘m o‘tgan shanba, 18-dekabr kuni soat besh yarimda viloyat IIB xodimlari tomonidan o‘tkazilgan tezkor tadbirda 900 ming so‘m pul bilan ushlangandi. Unga kimyoviy ishlov berilgan pulni o‘zim berdim. Ammo ertasi kuni yana ishga chiqdi. Biz shunga tushunmayapmiz”, — deydi bozor ishchisi Husan Mirzayev.
“Daryo” muxbiri bilan suhbatlashgan bozor ishchilarining qo‘shimcha qilishicha, tezkor tadbir paytidagi holat bosdi-bosdi qilinishi mumkin.
“Biz bu holat bosdi-bosdi qilinishi mumkinligidan qo‘rqyapmiz. Boisi bozorqo‘m har doim hamma ishni pul bilan hal qilishga o‘rgangan. Bu safar ham suvdan quruq chiqadiganga o‘xshaydi”, — dedi bozor ishchilari.
“Daryo” so‘roviga javob bergan viloyat IIB axborot xizmati vaziyatga aniqlik kiritib, holatni tasdiqladi.
“Haqiqatan ham o‘tgan shanba kuni tezkor tadbir o‘tkazilgandi. Tadbirda bozorqo‘m bilan bog‘liq holat ro‘y bergani rost. Ammo uni pora bilan qo‘lga tushdi deyishga shoshmasligimiz kerak. Bu masala yuzasidan tergovga qadar tekshiruv harakatlari olib borilmoqda. Tez orada bu haqda viloyat prokuraturasiga ma’lum qilamiz”, — deydi viloyat IIB axborot xizmati rahbari Javlon Baxtiyev.
Mavzuga doir:
- Toshkentda “Chorsu”dagi savdo joyi uchun 500 dollar pora so‘ragan bozor xodimi qo‘lga tushdi
- Andijonda dehqon bozoridan savdo rastasi ajratib berishni va’da qilgan shaxs fosh qilindi
- “Katta-katta hokimlarni javobgarlikka tortsangiz, sizni hurmat qilishni boshlayman”. Mirziyoyev yer ajratishdagi korrupsiya holatlari yuzasidan bosh prokurorga yuzlandi
Izoh (0)