Қашқадарё вилоятининг Қарши шаҳридаги марказий деҳқон озиқ-овқат бозори бозорқўми О.П. 900 минг сўм пул билан қўлга тушгани хабар берилди. «Дарё» сўровига жавоб берган вилоят ИИБ масъуллари хабарни тасдиқлади.
«Дарё» мухбири билан суҳбатлашган бозор ишчиси Ҳусан Мирзаевнинг маълумот беришича, унинг вилоят ИИБга қилган мурожаатига кўра, 2021 йилнинг 18 декабрь куни тезкор тадбир ўтказилган.
«Бозорқўм ўтган шанба, 18 декабрь куни соат беш яримда вилоят ИИБ ходимлари томонидан ўтказилган тезкор тадбирда 900 минг сўм пул билан ушланганди. Унга кимёвий ишлов берилган пулни ўзим бердим. Аммо эртаси куни яна ишга чиқди. Биз шунга тушунмаяпмиз», — дейди бозор ишчиси Ҳусан Мирзаев.
«Дарё» мухбири билан суҳбатлашган бозор ишчиларининг қўшимча қилишича, тезкор тадбир пайтидаги ҳолат босди-босди қилиниши мумкин.
«Биз бу ҳолат босди-босди қилиниши мумкинлигидан қўрқяпмиз. Боиси бозорқўм ҳар доим ҳамма ишни пул билан ҳал қилишга ўрганган. Бу сафар ҳам сувдан қуруқ чиқадиганга ўхшайди», — деди бозор ишчилари.
«Дарё» сўровига жавоб берган вилоят ИИБ ахборот хизмати вазиятга аниқлик киритиб, ҳолатни тасдиқлади.
«Ҳақиқатан ҳам ўтган шанба куни тезкор тадбир ўтказилганди. Тадбирда бозорқўм билан боғлиқ ҳолат рўй бергани рост. Аммо уни пора билан қўлга тушди дейишга шошмаслигимиз керак. Бу масала юзасидан терговга қадар текширув ҳаракатлари олиб борилмоқда. Тез орада бу ҳақда вилоят прокуратурасига маълум қиламиз», — дейди вилоят ИИБ ахборот хизмати раҳбари Жавлон Бахтиев.
Мавзуга доир:
- Тошкентда «Чорсу»даги савдо жойи учун 500 доллар пора сўраган бозор ходими қўлга тушди
- Андижонда деҳқон бозоридан савдо растаси ажратиб беришни ваъда қилган шахс фош қилинди
- «Катта-катта ҳокимларни жавобгарликка тортсангиз, сизни ҳурмат қилишни бошлайман». Мирзиёев ер ажратишдаги коррупция ҳолатлари юзасидан бош прокурорга юзланди
Изоҳ (0)