“Farg‘onada 163 ming nafar ishsiz bor, har yili mehnat bozoriga o‘rtacha 50-60 ming nafar yosh kirib kelmoqda” — Xayrullo Bozorov

Farg‘ona viloyatida hozirgi kunda 163 ming nafar ishsiz bor. Har yili mehnat bozoriga o‘rtacha 50—60 ming nafar yosh kirib kelmoqda. Bu haqda viloyat hokimi Xayrullo Bozorov xalq deputatlari viloyat kengashining 38-sessiyasidagi murojaatida ma’lum qildi, deb xabar berdi “Daryo” muxbiri.

Qayd etilishicha, viloyatning So‘x, Yozyovon, Buvayda tumanlarida ishsizlik darajasi yuqori. Xayrullo Bozorov viloyatda ishsizlar sonini kamaytirish, aholi daromadlarini oshirish va kambag‘allikni qisqartirish bo‘yicha amalga oshiriladigan ishlar haqida ma’lumot bergan.

Hozirgi kunda amalga oshirayotgan ishlarimizdan ko‘zlangan asosiy maqsad ham shu — ishsizlikni kamaytirish, aholi bandligini ta’minlash, ularning daromadlarini oshirish va kambag‘allikni qisqartirish. Shundan kelib chiqqan holda, 2022-yilda 152 mingdan ortiq doimiy ish o‘rni yaratiladi.

Davlatimiz rahbarining tashabbusi bilan paxta va g‘alladan qisqartiriladigan yer maydonlarini 10 yil muddatga fuqarolarga ijaraga berish tizimi yo‘lga qo‘yilmoqda.Viloyatda kelgusi yilda 4 ming 863 gektar paxta va g‘alla maydoni qisqartiriladi va bu orqali 35 ming nafar fuqaroning bandligi ta’minlanadi.

2022-yilda hududlarda foydalanishga qaytariladigan va yangi o‘zlashtiriladigan 2 ming 5 gektar yer maydoni kooperatsiya shaklida aholiga 10 sotixdan 1 gektargacha dehqonchilik qilish uchun bo‘lib beriladi va 15 ming nafar fuqaroning bandligi ta’minlanadi. Ishsiz 13 ming nafardan ziyod fuqaro jamoat ishlariga jalb etiladi, bunga jamg‘arma hisobidan qariyb 30 milliard so‘m yo‘naltiriladi.

Bandlik jamg‘armasidan 40,7 milliard so‘m subsidiya ajratiladi. 14 milliard so‘m subsidiya mablag‘lari hisobidan 4 ming 726 nafar fuqaroga issiqxonalar qurib beriladi. 10 milliard so‘m subsidiya mablag‘lari hisobidan 2 ming 715 ta fuqaroga mehnat asbob-uskunalari sotib olinadi. Kelgusi yilda hokim yordamchilari tomonidan aholini tadbirkorlikka o‘qitish, oilaviy tadbirkorlik dasturlari doirasida 900 milliard so‘m imtiyozli kredit mablag‘lari ajratilib, 22 ming nafardan ziyod aholining bandligi ta’minlanadi. 7 trillion so‘mlik 791 ta investitsiya loyihasi amalga oshirilib, 28 mingta yangi ish o‘rni yaratiladi. O‘zini o‘zi band qilish orqali 20 ming nafar aholini ro‘yxatdan o‘tkazish belgilangan.

Xayrullo Bozorov, Farg‘ona viloyati hokimi