Фарғона вилоятида ҳозирги кунда 163 минг нафар ишсиз бор. Ҳар йили меҳнат бозорига ўртача 50—60 минг нафар ёш кириб келмоқда. Бу ҳақда вилоят ҳокими Хайрулло Бозоров халқ депутатлари вилоят кенгашининг 38-сессиясидаги мурожаатида маълум қилди, деб хабар берди «Дарё» мухбири.
Қайд этилишича, вилоятнинг Сўх, Ёзёвон, Бувайда туманларида ишсизлик даражаси юқори. Хайрулло Бозоров вилоятда ишсизлар сонини камайтириш, аҳоли даромадларини ошириш ва камбағалликни қисқартириш бўйича амалга ошириладиган ишлар ҳақида маълумот берган.
Ҳозирги кунда амалга ошираётган ишларимиздан кўзланган асосий мақсад ҳам шу — ишсизликни камайтириш, аҳоли бандлигини таъминлаш, уларнинг даромадларини ошириш ва камбағалликни қисқартириш. Шундан келиб чиққан ҳолда, 2022 йилда 152 мингдан ортиқ доимий иш ўрни яратилади.Хайрулло Бозоровнинг айтишича, 152 мингта янги иш ўрни яратилишига вилоят ҳокимининг ўринбосарлари масъул бўлади.Давлатимиз раҳбарининг ташаббуси билан пахта ва ғалладан қисқартириладиган ер майдонларини 10 йил муддатга фуқароларга ижарага бериш тизими йўлга қўйилмоқда.Вилоятда келгуси йилда 4 минг 863 гектар пахта ва ғалла майдони қисқартирилади ва бу орқали 35 минг нафар фуқаронинг бандлиги таъминланади.
2022 йилда ҳудудларда фойдаланишга қайтариладиган ва янги ўзлаштириладиган 2 минг 5 гектар ер майдони кооперация шаклида аҳолига 10 сотихдан 1 гектаргача деҳқончилик қилиш учун бўлиб берилади ва 15 минг нафар фуқаронинг бандлиги таъминланади. Ишсиз 13 минг нафардан зиёд фуқаро жамоат ишларига жалб этилади, бунга жамғарма ҳисобидан қарийб 30 миллиард сўм йўналтирилади.
Бандлик жамғармасидан 40,7 миллиард сўм субсидия ажратилади. 14 миллиард сўм субсидия маблағлари ҳисобидан 4 минг 726 нафар фуқарога иссиқхоналар қуриб берилади. 10 миллиард сўм субсидия маблағлари ҳисобидан 2 минг 715 та фуқарога меҳнат асбоб-ускуналари сотиб олинади. Келгуси йилда ҳоким ёрдамчилари томонидан аҳолини тадбиркорликка ўқитиш, оилавий тадбиркорлик дастурлари доирасида 900 миллиард сўм имтиёзли кредит маблағлари ажратилиб, 22 минг нафардан зиёд аҳолининг бандлиги таъминланади. 7 триллион сўмлик 791 та инвестиция лойиҳаси амалга оширилиб, 28 мингта янги иш ўрни яратилади. Ўзини ўзи банд қилиш орқали 20 минг нафар аҳолини рўйхатдан ўтказиш белгиланган.
Хайрулло Бозоров, Фарғона вилояти ҳокими
Мавзуга доир:
- «Бир кило вазн ташлаганга 500 минг сўм берамиз». Хайрулло Бозоров ортиқча вазндан халос бўлган амалдорлар ва фуқароларга пул тўланишини маълум қилди
- «Эрталаб ва кечқурун пиёда юришни ташкил қилган маҳалла раислари ва ташкилот раҳбарларини Дубайга юбораман». Шуҳрат Абдураҳмонов қанча пул кетса ҳам одамларни юргазишини маълум қилди
- Қашқадарё ҳокими маҳалласида ажрим кузатилмаган раисларга 10 млн сўм мукофот бериб, энг яхши сиҳатгоҳларга юборишни ваъда қилди
Изоҳ (0)