Buxoro viloyatida bir nechta tuman hokimlari o‘zgardi. Ular orasida “zo‘ravon hokim” nomi bilan tanilgan Qorako‘l tumani hokimi Sherali Salomov ham bor, deya xabar bermoqda “Daryo” muxbiri.
Buxoro viloyati hokimi matbuot xizmatining ma’lum qilishicha, 22-dekabr kuni Xalq deputatlari Qorako‘l tumani kengashining navbatdan tashqari sessiyasi bo‘lib o‘tgan.
Unda Qorako‘l tumani hokimi Sherali Salomov egallab turgan lavozimidan bo‘shatilgan. Sessiya ishida viloyat hokimi Botir Zaripov tumanda amalga oshirilayotgan ishlar ko‘lami salmoqli bo‘lsa-da, sanoat, xizmat ko‘rsatish va servis sohalarini rivojlantirish, tadbirkorlikni qo‘llab-quvvatlash orqali yangi ish o‘rinlarini yaratish va aholi uchun munosib turmush sharoitini yaratish borasida mavjud imkoniyatlardan yetarlicha foydalanilmay kelinayotganini ta’kidlagan.
Sherali Salomov 2020-yilning 29-fevral kuni Qorako‘l tumaniga hokim etib tayinlangan edi. Unga qadar Olot tumani hokimi lavozimida ishlagan va fermer bilan janjallashib, uni do‘pposlab urgani vaji bilan “zo‘ravon hokim” nomi bilan tanilgan.
Rasman tasdiqlanmagan ma’lumotlarga ko‘ra, Sherali Salomov Qoraqalpog‘iston Respublikasiga mas’ul lavozimlardan biriga ishga tayinlanishi mumkin.
Sherali Salomov o‘rniga Romitanning sobiq hokimi Xurshid Tohirov tayinlangan. Xurshid Tohirov 1976-yilda Romitan tumanida tug‘ilgan. 2001-yilda Buxoro oziq-ovqat va yengil-sanoat texnologiyasi institutini hamda 2007-yilda Toshkent Moliya institutini bitirgan. Mutaxassisligi — transport vositalaridan foydalanish va moliya. U mehnat faoliyatini 1995-yilda Romitan tumani moliya bo‘limi hisobchisi sifatida boshlab, 2001—2005-yillarda Romitan tumani moliya bo‘limi bosh hisobchisi, 2005—2017-yillarda Romitan tumani moliya bo‘limi mudiri va moliya bo‘limi mudiri o‘rinbosari, 2017—2019-yillarda Romitan tumani hokimining birinchi o‘rinbosari lavozimlarida ishlagan.
Sessiya ishi Shofirkon tumanida davom etgan. Mazkur sessiyada 2020-yilning 8-fevralida Markaziy bank viloyat bosh boshqarmasi boshlig‘i lavozimidan tuman hokimi etib tayinlangan Shukurullo Hakimov ham vazifasidan ozod etilgan. U joriy yilning 29-sentabr kuni viloyat rahbari Botir Zaripov tomonidan 5 nafar tuman hokimiga xayfsan berilganda “Daryo”ga “Ko‘plab murojaatlar uyushtirilgan holda tashkil etilgani oydinlashdi”, deya intervyu bergan edi.
Shofirkon tumani hokimi vazifasiga Markaziy bank viloyat bosh boshqarmasi boshlig‘i Jamshid Sharopov tayinlangan. U 2005-yilda Buxoro davlat universitetini hamda 2009-yilda Toshkent davlat iqtisodiyot universitetini bitirgan. Mutaxassisiligi — iqtisodchi. Mehnat faoliyatini 2002-yilda “Paxtabank”ning viloyat boshqarmasi mutaxassisi sifatida boshlab, “Agrobank”ning viloyat boshqarmasida bo‘lim boshlig‘i o‘rinbosari, Buxoro shahar filiali boshqaruvchisi, 2014—2020-yillarda “Agrobank”ning viloyat boshqarmasi boshlig‘i lavozimlarida ishlagan.
Izoh (0)