Professional boks bo‘yicha ikkinchi yarim yengil vazn (-55,34 kg) toifasida WBA va IBF kamarlari sohibi Murodjon Ahmadaliyev uylandi. Nikoh oqshomi 2021-yilning 18-dekabr kuni bo‘lib o‘tdi.
Ahmadaliyevning to‘yiga ko‘plab taniqli bokschilar hamda chet ellik murabbiylar tashrif buyurdi. Ular orasida bokschilar Bahodir Jalolov, Shahram G‘iyosov, Iqboljon Xoldorov, Hasanboy Do‘stmatov, Isriol Madrimov va boshqa mashhur nomlarni uchratish mumkin.
17-dekabr kuni Toshkentda jang o‘tkazgan Elnur Abduraimov esa Ahmadaliyevga kuyovjo‘ralik qildi.
Qayd etish kerak, avvalroq badiiy gimnastikachi Sabina Toshkenboyeva va taekvondochi Niyoz Po‘latov turmush qurishi haqida xabar berilgandi.
Ungacha esa Tokio—2020 Olimpiadasi bronza medali sohibi Bekzod Abdurahmonov va ushbu Olimpiya o‘yinlarida O‘zbekiston bayroqdori bo‘lgan taekvondochi Nigora Tursunqulova oila qurgani hamda ularga Prezident tabrigi va sovg‘alari yetkazilgani to‘g‘risida xabar berilgandi.
Ma’lumot uchun, Ahmadaliyev 2021-yilning noyabr oyida chililik Xose Velaskesni mag‘lub etib, chempionlik kamarlarini ikkinchi marta himoya qilgan edi. Aprel oyida bo‘lib o‘tgan jangida esa yaponiyalik Ryosuke Ivasani beshinchi raundda nokautga uchratgan.
Izoh (0)