Ижтимоий тармоқларда Фарғона вилоятидаги туғруқхоналарнинг бирида шифокор ва беморнинг яқинлари ўртасидаги тортишув акс этган видео тарқалди. Видеода тўлғоқ тутаётган ҳомиладор аёлнинг эри яшаш манзили бошқа ҳудуд бўлгани учун хотинини туғруқхонага қабул қилишмаганини, маълум миқдордаги пул сўрашганини, видеога ола бошлаганидан кейингина вазият ўзгарганини айтган.
Бироқ, видеода видео муаллифи айтган ҳолат эмас, аёлнинг яқинлари уни олиб кетишга урингани кўринган. Шифокор эса ҳомиладор аёлни олиб қолишга ҳаракат қилган. Шу ерда туғдириш зарурлигини, аёл бошқа жойга етиб боролмай қолиши мумкинлигини айтган.«Нега энди бунақа қиляпсиз, нега аввал қабул қилмайман дедингиз-да, энди видеога олаётганим учун ўзгариб қолдингиз? Йўқ, биз энди олиб кетамиз. Сиз қабул қилмайман дедингиз, энди биз бошқа жойга олиб борамиз. Туғмайди энди. Бир гап бўлса, Сиз жавоб берасиз. Ҳозир пул сўраётгандингиз-ку, қабул қилмайман дегандингиз-ку. Мен шу видео билан президентга чиқаман», — дейди ҳомиладор аёлнинг эри. Туғруқхона бош шифокори экани айтилган аёл эса видеога олаётган эркакни ҳақоратлаб, беморни олиб кетишига қаршилик кўрсатган.
«Дарё» мухбирининг аниқлик киритишича, видеодаги ҳолат жорий йилнинг 11 декабрь куни Фарғона вилоят перинатал марказида кузатилган.
Дастлаб, ҳолат юзасидан изоҳ олиш мақсадида видеодаги ҳомиладор аёл — Гулсанам Пўлатованинг турмуш ўртоғи Миродил Пўлатов билан боғландик.
«11 декабрь куни кеч соат 6-7 ларда турмуш ўртоғим Гулсанам Пўлатованинг тўлғоғи тутиб, бироз тоби қочиб қолди. Ўзимизнинг поликлиникадаги шифокорлар туғруқ вақтини 2 январь кунига белгилашганди. Биз қўрқиб кетиб тез тиббий ёрдамга телефон қилдик. Тез тиббий ёрдам турмуш ўртоғимни тўғри ‘Ойбек’ туғруқхонасига олиб борди. Туғруқхонага борганимизда тўловлари борлигини айтишди. Мен ‘бепул эмасми’ десам, ‘қаерда бепул жой бор, тўлов қилмасангиз беморни олиб кетаверинг’, дейишди. Унда менга қабул қилмаймиз, деб ёзиб беринглар десам, ‘Сизга ким ёзиб беради’, дейишди. Унда ўзим видеога ёзиб оламан деб телефонимни олишим билан ҳақоратлаб кетишди. Телефонимни олиб қўйиш учун югурди, ололмаганидан кейин мулойим гапира бошлади. Эшикни қулфлаб олиб, ўзим шу ерда туғдираманга ўтиб олди ва хотинимни ичкарига қараб судрашга тушди. ‘Шу ерда туғасан’, деб. Шунча қилган ишларидан кейин қандай қилиб бу аёлга ишонардим. Бир нарса қилиб эшикни очиб, турмуш ўртоғимни Водилга (Фарғона тумани маркази) олиб кетдим. 30-35 километр жойга ўзимнинг Damas машинамда олиб бордим. Водилдаги туғруқхона шифокорларига раҳмат. Дарров беш-олтита ходими чиқиб, турмуш ўртоғимни қабул қилиб олди. Яхши хизмат кўрсатишди, миннатдорман», — дейди Миродил Пўлатов.
«Дарё» сўровига кўра, вилоят соғлиқни сақлаш бошқармаси ҳолат юзасидан қўшимча маълумот берди.
Маълум қилинишича, 11 декабрь куни соат 17:50 ларда Фарғона тумани «Чекшўра» маҳалла фуқаролар йиғинида яшовчи 1994 йилда туғилган ҳомиладор аёл Гулсанам Пўлатова оила аъзолари ҳамроҳлигида шахсий машинада вилоят перинатал марказига келган ва ҳеч қандай йўлланмасиз шифокорларга мурожаат қилган.
Қабул бўлими навбатчи акушер-гинекологи Д.Мамасидиқова ҳомиладор аёлга акушерлик кўруви ўтказиб, аёлда тўлғоқ дарди борлигини маълум қилган. Шунингдек, туғруқхонада қолиш учун коронавирусга қарши тест топшириши кераклигини, бу таҳлил тўлов асосида амалга оширилишини тушунтирган.
«Соғлиқни сақлаш вазирлигининг 151-сонли буйруғига кўра, ҳомиладор ва туғувчи аёлларга тиббий хизмат кўрсатиш ҳудудийлаштириш тамойилларига асосланади. Физиологик туғруқлар биринчи даражали туғруқ бўлимларида амалга оширилади. Вилоят перинатал маркази эса учинчи даражали туғруқ муассасаси ҳисобланиб, у ерда ҳомиладорлиги асоратлар билан ўтаётган, она ва бола саломатлигига таъсир қиладиган хавфлар мавжуд бўлган ва операция ўтказилиши шарт бўлган ҳомиладор аёллар қабул қилинади.
Ҳомиладор аёлнинг турмуш ўртоғи буйруқларнинг асл моҳиятини тушунишни хоҳламаган. Перинатал марказ мутахассислари Гулсанам Пўлатовани туғруқхонада олиб қолишга қарор қилганлигига қарамасдан, турмуш ўртоғи уни мажбурлаб, олиб кетишга уринган. Қайд этилишича, Гулсанам Пўлатова Фарғона тумани тиббиёт бирлашмасига қарашли туғруқ бўлимига 40 дақиқадан сўнг етиб бориб, соат 20:35 да қиз фарзанд кўрган. Туғруқ асоратсиз кечган, она ва боланинг саломатлиги яхши. Туғруқ жараёнини вилоят перинатал марказининг бош шифокори телефон орқали назорат қилиб турган», — дейилади бошқарма ахборотида.
Гулсанам Пўлатованинг турмуш ўртоғи ва қайнонаси уларни вилоят перинатал марказига тез тиббий ёрдам машинаси олиб борганини айтди. Вилоят соғлиқни сақлаш бошқармаси эса ҳомиладор аёл оила аъзолари ҳамроҳлигида шахсий машинасида келганини маълум қилди. Ўша куни навбатчиликда турган перинатал маркази қоровули Самадилло Юсупов соғлиқни сақлаш бошқармасининг маълумотини тасдиқлади. Унинг айтишича, Гулсанам Пўлатова ва унинг яқинлари туғруқхонага шахсий Damas машинасида келишган ва яна худди шу автомашинада қайтиб кетишган.Қайд этилишича, 16 декабрь куни ижтимоий тармоқларда тарқалган видео юзасидан вилоят соғлиқни сақлаш бошқармасида йиғилиш ўтказилган. Йиғилиш давомида вилоят перинатал маркази бош шифокорининг деонтология (шифокор муомаласи) қоидаларини бузганлиги аниқланган. Бош шифокордан тушунтириш хати олиниб, интизомий чора кўриш мақсадида Соғлиқни сақлаш вазирлигига юборилган.
Изоҳ (0)