Buxoro viloyati IIB axborot xizmati rahbari Shuhrat Jalolovning “Daryo”ga xabar berishicha, Buxoro viloyati Romitan tumanida fuqaroning nogironlik nafaqasini rasmiylashtirib berish evaziga undan 500 dollar olayotgan shifokor qo‘lga olingan.
Ma’lum qilinishicha, Romitan tumanidagi ko‘p tarmoqli markaziy poliklinikada faoliyat yuritib kelayotgan shifokor F.X. o‘z xizmat mavqeyidan foydalanib, 2-guruh nogironi bo‘lgan fuqaro Sh.J.dan nogironlik hujjatlarini rasmiylashtirib berishi evaziga 500 dollar berishini talab qilgan. Buncha miqdordagi mablag‘ga ega bo‘lmagan fuqaro holat yuzasidan ichki ishlar organlariga murojaat qilishga majbur bo‘lgan.
Qayd etilishicha, Sh.J.ning arizasiga asosan, 11-dekabr kuni viloyat Ichki ishlar boshqarmasi va boshqa huquqni muhofaza qiluvchi idoralar hamkorligida tezkor tadbir o‘tkazilgan. Unda mazkur poliklinika shifokori F.X. o‘z xizmat xonasida kimyoviy ishlov berilgan 500 dollarni pora tariqasida olayotgan vaqtida qo‘lga olingan.
Mazkur holat yuzasidan Jinoyat kodeksining 168-moddasi (firibgarlik) 3-qismi “a” bandi jinoyat ishi qo‘zg‘atilib, dastlabki tergov harakatlari olib borilmoqda.
Mavzuga doir:
- Buxoroda hamshiralikka ishga joylashtirish uchun 600 dollar olgan bosh shifokor ushlandi
- Buxoroda tibbiyot kollejiga 400 dollar evaziga o‘qishga kiritishni va’da qilgan shaxs ushlandi. U tergov davom etayotgan vaqtda yana pora bilan qo‘lga tushgan
- Buxoroda hamshiralikka ishga joylashtirishni va’da qilib, fuqarodan 1700 dollar olgan shaxs qo‘lga olindi
Izoh (0)