Бухоро вилояти ИИБ ахборот хизмати раҳбари Шуҳрат Жалоловнинг «Дарё»га хабар беришича, Бухоро вилояти Ромитан туманида фуқаронинг ногиронлик нафақасини расмийлаштириб бериш эвазига ундан 500 доллар олаётган шифокор қўлга олинган.
Маълум қилинишича, Ромитан туманидаги кўп тармоқли марказий поликлиникада фаолият юритиб келаётган шифокор Ф.Х. ўз хизмат мавқейидан фойдаланиб, 2-гуруҳ ногирони бўлган фуқаро Ш.Ж.дан ногиронлик ҳужжатларини расмийлаштириб бериши эвазига 500 доллар беришини талаб қилган. Бунча миқдордаги маблағга эга бўлмаган фуқаро ҳолат юзасидан ички ишлар органларига мурожаат қилишга мажбур бўлган.
Қайд этилишича, Ш.Ж.нинг аризасига асосан, 11 декабрь куни вилоят Ички ишлар бошқармаси ва бошқа ҳуқуқни муҳофаза қилувчи идоралар ҳамкорлигида тезкор тадбир ўтказилган. Унда мазкур поликлиника шифокори Ф.Х. ўз хизмат хонасида кимёвий ишлов берилган 500 долларни пора тариқасида олаётган вақтида қўлга олинган.
Мазкур ҳолат юзасидан Жиноят кодексининг 168-моддаси (фирибгарлик) 3-қисми «а» банди жиноят иши қўзғатилиб, дастлабки тергов ҳаракатлари олиб борилмоқда.
Мавзуга доир:
- Бухорода ҳамшираликка ишга жойлаштириш учун 600 доллар олган бош шифокор ушланди
- Бухорода тиббиёт коллежига 400 доллар эвазига ўқишга киритишни ваъда қилган шахс ушланди. У тергов давом этаётган вақтда яна пора билан қўлга тушган
- Бухорода ҳамшираликка ишга жойлаштиришни ваъда қилиб, фуқародан 1700 доллар олган шахс қўлга олинди
Изоҳ (0)