“Fuqarolarning davlat pensiya ta’minoti to‘g‘risida”gi qonun hamda Mehnat kodeksiga o‘zgartish va qo‘shimchalar kiritilmoqda. Bu haqda Oliy Majlis Qonunchilik palatasi deputati Rasul Kusherbayev o‘zining Telegram kanali orqali ma’lum qildi.
Yangi qonun loyihasiga ko‘ra:
- boquvchisini yo‘qotganlik pensiyasi to‘lovlarini marhumning qaramog‘idagi farzandlariga, ular 18 yoshgacha, agar umumiy o‘rta ta’lim muassasasi, akademik litsey va oliy ta’lim muassasasida o‘qiyotgan bo‘lsa 23 yoshga to‘lgunga qadar boquvchisini yo‘qotganlik pensiyasini to‘lash;
- nogironligi bolalikdan bo‘lgan bolalarga 18 yoshgacha qaragan davrini ish stajiga qo‘shib hisoblash;
- bolani parvarishlash bo‘lish vaqtining hammasini jamlanganda ko‘pi bilan 6 yillik davrni ish stajiga qo‘shib hisoblash;
- respublika hududida karantinli va inson uchun xavfli bo‘lgan boshqa yuqumli kasalliklar tarqalishi tahdidi mavjud bo‘lgan davrda amal qilib turgan davrda pensiya olish huquqi vujudga kelgan fuqarolar, ushbu tadbirlar (cheklovlar) davrida yoki tugagandan so‘ng bir oy ichida pensiya tayinlashni so‘rab murojaat etgan taqdirda, ularga pensiya uni olish huquqi paydo bo‘lgan sanadan tayinlash taklif etilmoqda.
“So‘nggi yillardagi o‘zgarishlar inobatga olinsa, mazkur yangiliklar fuqarolarga qulaylik yaratish yo‘lidagi progressiv qadam, deyish mumkin”, — deya qayd etadi deputat.
Avvalroq O‘zbekistonda 2022-yil 1-iyuldan boshlab davlat pensiyalarini tayinlashda fuqarolardan qator hujjatlarni talab qilish bekor qilinishi, O‘zbekistonda pensiya va nafaqa oluvchilar soni ma’lum qilingani, O‘zbekistonda muddatidan ilgari pensiya tayinlash tartibiga o‘zgartirishlar kiritilgani to‘g‘risida xabar berilgandi.
Izoh (0)