Moskva viloyatining Solnechnogorsk shaharchasidagi mehnat migrantlari yashaydigan turar joyda 13-noyabrda sodir bo‘lgan yong‘inda 4 nafar o‘zbekistonlik halok bo‘lgani to‘g‘risida xabar berilgandi. O‘zbekiston Tashqi mehnat migratsiyasi agentligi ijtimoiy tarmoqlarda mazkur fuqarolarning jasadlarini vatanga qaytarishda muammolar yuzaga kelayotgani hamda buning uchun mablag‘ yig‘ilayotgani haqida tarqalgan murojaatga munosabat bildirdi.
Ma’lumot uchun, Moskva viloyatining Solnechnogorsk shaharchasi Pribrejnaya ko‘chasida joylashgan quruvchilarning vaqtincha turar joyida 2021-yilning 13-noyabr kuni yuz bergan yong‘in oqibatida ushbu vaqtincha turar joyda yashab kelgan mehnat migrantlari orasida 2 kishi jarohat olgan va 4 kishi vafot etgan.
Dastlabki ma’lumotlarga ko‘ra, vafot etganlarning barchasi O‘zbekiston fuqarolari Sh.A. (1969-yilda tug‘ilgan), E.U. (1998-yilda tug‘ilgan), Sh.K. (1987-yilda tug‘ilgan), A.R. (1998-yilda tug‘ilgan), ammo jasadlarni vatanga qaytarish uchun qaysi jasad qaysi shaxsga tegishli ekanini aniqlash talab etiladi.
Shuningdek, Rossiya qonunchiligiga ko‘ra, belgilangan tartibga muvofiq davlat tashkiloti tomonidan o‘tkaziladigan DNK tekshiruvi natijalari olingach, ya’ni har bir jasadning shaxsi aniqlangandan keyin tergov qo‘mitasi ruxsati bilan jasadlarni olib chiqib ketishning imkoni bo‘ladi.
“Shu o‘rinda, marhumlar qarindoshlaridan chet davlat qonunlari, tartib qoidalarini e’tiborga olishlarini hamda ijtimoiy tarmoq faollaridan ularning ayni paytdagi hissiyotlaridan foydalanib, ommani chalg‘itish, mablag‘ yig‘ishga qaratilgan chiqishlar qilmasliklarini so‘raymiz”, — deyiladi munosabatda.
Eslatib o‘tamiz, 2020-yilning yanvar oyi oxirlarida Rossiyaning Tomsk viloyatida yuz bergan yong‘inda 12 nafar o‘zbekistonlik halok bo‘lgan, yana 2 nafari ushbu yong‘inda tirik qolgandi. Halok bo‘lganlarning jasadi va tirik qolgan ikki fuqaro O‘zbekistonga olib kelingan.
O‘sha yilning may oyida Rossiyaning Moskva viloyatidagi Ramenskoye tumanida muhojirlar yotoqxonasida yuz bergan yong‘inda 6 nafar o‘zbekistonlik halok bo‘lgandi.
Izoh (0)