Prezident Shavkat Mirziyoyev boshchiligida o‘tkazilayotgan videoselektor yig‘ilishida endokrin kasalliklarini birlamchi bo‘g‘inda erta aniqlash muammolariga to‘xtalib o‘tdi. Bu haqda “Daryo” muxbiri xabar qilmoqda.
Buning uchun, laboratoriyalarni jihozlash, zarur reaktivlar bilan ta’minlash va nafaqat endokrinolog, balki oilaviy shifokorlarni ham tayyorlash katta samara berishi qayd etildi.
“Lekin, bitta tumanda kamida 10–15 ta laboratoriya bo‘lgani bilan, qonni tahlil qilishga sharoit va mutaxassislar malakasi yetishmasligi oqibatida, diabetning og‘ir asoratlari – ko‘z, buyrak va to‘piq kasalliklari bo‘yicha respublika muassasalariga murojaatlar 10 foizga oshgan”, – deydi Prezident.
Prezident Uychi tumani tibbiyot birlashmasiga qarashli 14 ta laboratoriyada jami 62 nafar, shundan markaziy shifoxona va poliklinika hamda shoshilinch tibbiy yordam bo‘limi laboratoriyasida jami 40 nafar xodim ishlashini misol qilib keltirdi. Ushbu xodimlarning ish haqi uchun yiliga 2,2 milliard so‘m, laboratoriyaga reaktivlar uchun esa atigi 175 million so‘m ajratilayotgani aytildi.
Tuman shifoxonasida diabeti bor bemordan, bir sutkalik statsionar kuzatish davomida o‘rtacha 8 marotaba qon tahlili olish zarur bo‘lsada, 15 ta laboratoriya va 60 dan ortiq xodimi bo‘lgan tuman darajasida buning imkoni yo‘qligi tanqid qilindi.
“Sababi oddiy, markaziy shifoxona va markaziy poliklinikada laboratoriyalarning ish vaqti tushlik payti – soat 14:00 da tugaydi. Tunu-kun ishlaydigan shoshilinch tibbiy yordam bo‘limi laboratoriyasi esa, bir hududda bo‘la turib, shifoxonaning boshqa bo‘limlariga xizmat ko‘rsatmaydi”, – deydi Mirziyoyev.
Prezident, shuningdek, tumanlarda yod defitsiti, qalqonsimon bez kasalliklarini aniqlash bo‘yicha gormonal tahlillar yo‘lga qo‘yilmagani bois, aholi xususiy laboratoriyalarga borishga majbur bo‘layotganini bildirdi.
“Oqibatda xalqimiz sog‘liqni saqlash tizimidan mutlaqo norozi. Bularni viloyat, tuman va shahar hokimlari, sog‘liqni saqlash idoralari boshliqlari bilmaydi-mi?”, – dedi davlat rahbari.
Shu bois, endokrin kasalliklarini barvaqt aniqlash, ularning oldini olish va davolash bo‘yicha alohida Dastur qabul qilinishi xabar qilinishi bildirildi.
Izoh (0)