O‘zbekistonlik MMA jangchisi Bunyod To‘xtayev Rossiyaning Sankt-Peterburg shahri politsiya bo‘limidan qochib ketdi, deya xabar qilmoqda “Interfaks”.
Dastlabki ma’lumotlarga ko‘ra, 8-dekabr kuni To‘xtayev ekstremizmga qarshi kurash markazi xodimlariga nisbatan agressiv munosabatda bo‘lgan. Yakkakurashchi xodimlardan biriga zarba bergan va voqea joyidan yashirinishga uringan. Biroq politsiya uni qo‘lga olgan va mahkamaga olib ketgan.
Ertasi kuni Bunyod politsiya mahkamasidan qochib ketishga muvaffaq bo‘lgan.
Qayd etilishicha, politsiya 8-dekabr kuni To‘xtayevni QR-kod va migratsion hujjatlar savdosi bilan shug‘ullanganlikda gumon qilib, so‘roq ostiga olgan. O‘sha vaqtda sportchi va huquqni muhofaza qilish xodimlari o‘rtasida kelishmovchilik yuzaga kelgan.
Bo‘lib o‘tgan voqealardan keyin unga “soxta hujjatlarni tayyorlash, soxtalashtirish yoki ayirboshlash” va “hukumat vakiliga nisbatan kuch ishlatish” bandlari bilan jinoyat ishi qo‘zg‘atilgan. Ayni vaqtda To‘xtayev qidiruvga berilgan.
Avvalroq Guam orolida istiqomat qiluvchi, asli o‘zbekistonlik bo‘lgan MMA jangchisi Akmal Hojiyev vaksinatsiya mavzusidagi tortishuv sabab o‘z uyida shifokorni o‘ldirib qo‘ygani xabar qilingandi.
Izoh (0)