Toshkentda Afg‘oniston muvaqqat hukumati bilan transafg‘on temiryo‘li qurilishi loyihasi muhokama qilindi
O‘zbekiston, Qozog‘iston, Rossiya va Pokiston vakillari Afg‘oniston muvaqqat hukumati bilan Termiz—Mozori Sharif —Kobul—Peshovar transafg‘on temiryo‘li qurilishi loyihasini muhokama qilishga kirishdi. Bu haqda “O‘zbekiston temir yo‘llari” matbuot xizmati xabar berdi.
Qayd etilishicha, 6—7-dekabr kunlari Toshkentda ushbu temiryo‘l liniyasini loyihalash va qurish bo‘yicha transport vazirliklari va idoralarning mas’ul rahbarlari va mutasaddi vakillari ishtirokida uch tomonlama (O‘zbekiston, Afg‘oniston, Pokiston) va ko‘p tomonlama (O‘zbekiston, Rossiya, Qozog‘iston, Afg‘oniston, Pokiston) muzokaralar bo‘lib o‘tdi.
Yig‘ilish yakunida tomonlar tez orada ilgari surilgan temiryo‘l liniyasini qurish loyihasini joyiga chiqqan holda o‘rganish, ishchi guruhlar yig‘ilishini doimiy ravishda o‘tkazish va dastlabki texnik-iqtisodiy asoslarni ishlab chiqqandan so‘ng loyihaga xalqaro moliya institutlarini jalb qilish bo‘yicha kelishib oldi.
Tomonlar qo‘shnichilik aloqalarini mustahkamlash, xalqaro transport kommunikatsiyalari va savdo aloqalarining mintaqalararo hamkorligini rivojlantirish, shuningdek, iqtisodiyotning turli tarmoqlarida hamkorlikni chuqurlashtirishda mazkur loyiha ahamiyatini ta’kidlab o‘tgan.
7-oktabr kuni O‘zbekiston tashqi ishlar vaziri Abdulaziz Komilov boshchiligidagi delegatsiya Afg‘oniston muvaqqat hukumat rahbarining siyosiy masalalar bo‘yicha o‘rinbosari Mulla Abdul Kabir boshchiligidagi Afg‘oniston rahbariyati vakillari bilan muzokaralar o‘tkazgandi. Uchrashuv davomida tomonlar yaqin orada Termiz shahrida savdo-iqtisodiy masalalarini, jumladan, Mozori Sharif—Kobul—Peshovar yo‘nalishi bo‘ylab temiryo‘l qurish loyihalarini amalga oshirish masalalarini muhokama qilish uchun qo‘shma muzokaralar o‘tkazish to‘g‘risida kelishib olgandi.
30-noyabr kuni O‘zbekiston prezidentining Afg‘oniston bo‘yicha maxsus vakili Ismatulla Irgashev boshchiligidagi delegatsiyasining Kobulda Afg‘oniston muvaqqat hukumati vakillari bilan bo‘lgan uchrashuvda Afg‘oniston tomoni O‘zbekiston tashabbusi bilan boshlangan Mozori Sharif–Kobul–Peshovar temiryo‘l qurilishi loyihasini amalga oshirishni imkon qadar tezroq boshlashga tayyorligini tasdiqlagandi.
Eslatib o‘tamiz, 2-fevral kuni O‘zbekiston—Afg‘oniston—Pokiston o‘rtasidagi yuqori darajadagi muzokaralar natijalari bo‘yicha O‘zbekistonga boshqa bozorlarga chiqish uchun “eng qisqa va eng arzon yo‘l” bo‘ladigan Mozori Sharif—Kobul—Peshovar temiryo‘lini qurish bo‘yicha qo‘shma harakatlar rejasi (“Yo‘l xaritasi”) qabul qilingan.
Temiryo‘l qurish loyihasini moliyalashtirish uchun O‘zbekiston, Afg‘oniston va Pokiston davlat rahbarlari nomidan qo‘shma murojaati asosida AQSh Xalqaro taraqqiyot moliya korporatsiyasining va boshqa xalqaro moliya institutlari mablag‘larining jalb etilishi ko‘zda tutilgan.
Temiryo‘l qurilishi 2022-yilning sentabr oyida boshlanishi rejalashtirilgan.
