Тошкентда Афғонистон муваққат ҳукумати билан трансафғон темир йўли қурилиши лойиҳаси муҳокама қилинди

Ўзбекистон, Қозоғистон, Россия ва Покистон вакиллари Афғонистон муваққат ҳукумати билан Термиз—Мозори Шариф —Кобул—Пешовар трансафғон темир йўли қурилиши лойиҳасини муҳокама қилишга киришди. Бу ҳақда «Ўзбекистон темир йўллари» матбуот хизмати хабар берди.

Қайд этилишича, 6—7 декабрь кунлари Тошкентда ушбу темир йўл линиясини лойиҳалаш ва қуриш бўйича транспорт вазирликлари ва идораларнинг масъул раҳбарлари ва мутасадди вакиллари иштирокида уч томонлама (Ўзбекистон, Афғонистон, Покистон) ва кўп томонлама (Ўзбекистон, Россия, Қозоғистон, Афғонистон, Покистон) музокаралар бўлиб ўтди.

Йиғилиш якунида томонлар тез орада илгари сурилган темир йўл линиясини қуриш лойиҳасини жойига чиққан ҳолда ўрганиш, ишчи гуруҳлар йиғилишини доимий равишда ўтказиш ва дастлабки техник-иқтисодий асосларни ишлаб чиққандан сўнг лойиҳага халқаро молия институтларини жалб қилиш бўйича келишиб олди.

Томонлар қўшничилик алоқаларини мустаҳкамлаш, халқаро транспорт коммуникациялари ва савдо алоқаларининг минтақалараро ҳамкорлигини ривожлантириш, шунингдек, иқтисодиётнинг турли тармоқларида ҳамкорликни чуқурлаштиришда мазкур лойиҳа аҳамиятини таъкидлаб ўтган.

7 октябрь куни Ўзбекистон ташқи ишлар вазири Абдулазиз Комилов бошчилигидаги делегация Афғонистон муваққат ҳукумат раҳбарининг сиёсий масалалар бўйича ўринбосари Мулла Абдул Кабир бошчилигидаги Афғонистон раҳбарияти вакиллари билан музокаралар ўтказганди. Учрашув давомида томонлар яқин орада Термиз шаҳрида савдо-иқтисодий масалаларини, жумладан,  Мозори Шариф—Кобул—Пешовар йўналиши бўйлаб темир йўл қуриш лойиҳаларини амалга ошириш масалаларини муҳокама қилиш учун қўшма музокаралар ўтказиш тўғрисида келишиб олганди.

30 ноябрь куни Ўзбекистон президентининг Афғонистон бўйича махсус вакили Исматулла Иргашев бошчилигидаги делегациясининг Кобулда Афғонистон муваққат ҳукумати вакиллари билан бўлган учрашувда Афғонистон томони Ўзбекистон ташаббуси билан бошланган Мозори Шариф–Кобул–Пешовар темир йўл қурилиши лойиҳасини амалга оширишни имкон қадар тезроқ бошлашга тайёрлигини тасдиқлаганди.

Эслатиб ўтамиз, 2 февраль куни Ўзбекистон—Афғонистон—Покистон ўртасидаги юқори даражадаги музокаралар натижалари бўйича Ўзбекистонга бошқа бозорларга чиқиш учун «энг қисқа ва энг арзон йўл» бўладиган Мозори Шариф—Кобул—Пешовар темир йўлини қуриш бўйича қўшма ҳаракатлар режаси («Йўл харитаси») қабул қилинган.

Темир йўл қуриш лойиҳасини молиялаштириш учун Ўзбекистон, Афғонистон ва Покистон давлат раҳбарлари номидан қўшма мурожаати асосида АҚШ Халқаро тараққиёт молия корпорациясининг ва бошқа халқаро молия институтлари маблағларининг жалб этилиши кўзда тутилган.

Темир йўл қурилиши 2022 йилнинг сентябрь ойида бошланиши режалаштирилган.