Qonunchilik palatasining 10-dekabr kuni bo‘lib o‘tgan majlisida “O‘zbekiston Respublikasi Fuqarolik kodeksining 565-moddasiga o‘zgartish va qo‘shimcha kiritish to‘g‘risida”gi qonun loyihasi deputatlar tomonidan birinchi o‘qishda ko‘rib chiqildi. Bu haqda palata axborot xizmati xabar qildi.
Ma’lum qilinishicha, amaldagi qonunchilik avtomototransport vositalarini ijaraga berish shartnomalari notarial tasdiqlashni talab etadi. Bu o‘z navbatida, aholi va tadbirkorlik subyektlarining ortiqcha ovoragarchiligini keltirib chiqaradi.
Qayd etilishicha, mazkur qonun loyihasi bilan avtomototransport vositalari elektron savdo platformasi orqali ijaraga berilganda shartnomani notarial tartibda tasdiqlash talabi bekor qilinadi. Bu kabi shartnomalar oddiy yozma shaklda tuzilishi mumkin bo‘ladi.
Qonun loyihasi deputatlar tomonidan qabul qilingan.
Eslatib o‘tamiz, 2018-yilda Fuqarolik kodeksiga kiritilgan o‘zgartirishga muvofiq avtomototransport vositalarini 30 kungacha bo‘lgan muddatga ijaraga berish shartnomalarini notarial tasdiqlash shart emas.
Avvalroq Hukumat qarori bilan Yengil avtomobillar va mototransport vositalarini qisqa muddatli ijaraga berish tartibi to‘g‘risidagi nizomga o‘zgartirish va qo‘shimchalar kiritilgandi. Unga ko‘ra, endi yuridik shaxslar ham avtomobillarni qisqa muddatga ijaraga olishi mumkin bo‘ldi.
Izoh (0)