“Yo‘l harakati xavfsizligi sohasida davlat xizmatlari ko‘rsatish tartib-taomillarini soddalashtirish chora-tadbirlari to‘g‘risida”gi Vazirlar Mahkamasining qarori qabul qilindi. Bu haqda Adliya vazirligi xabar qilmoqda.

Foto: “Daryo”

Qarorga ko‘ra, 2021-yil 1-avgustdan quyidagi davlat xizmatlari Yagona interaktiv davlat xizmatlari portali (YaIDXP) orqali ko‘rsatiladi:

  • avtomototransportlar va shahar elektr transportlari haydovchilarini tayyorlash, qayta tayyorlash va ularning malakasini oshirish bo‘yicha nodavlat ta’lim xizmatlari ko‘rsatuvchi yuridik shaxslarning o‘quv guruhlarini ro‘yxatga olish;
  • avtomototransportlar va shahar elektr transportlari haydovchiligiga nomzodlardan imtihonlarni qabul qilish uchun hujjatlarni va milliy haydovchilik guvohnomasini rasmiylashtirish.

2021-yil 1-sentabrdan haydovchilardan avtomototransportni boshqarish uchun ishonchnoma (notarial tartibda tasdiqlangan), texnik ko‘rikdan o‘tkazilganligi to‘g‘risidagi ma’lumot, avtotransport vositalari oynalarining tusini o‘zgartirishga (qoraytirishga) ruxsatnoma elektron shaklga o‘tkazish orqali mazkur hujjatlarni haydovchidan talab etish tartibi bekor qilinadi.

2021-yil 1-iyulga qadar DYHXX organlarida avtomatlashtirilgan elektron tizimlarning YaIDXPga integratsiya qilingan holda to‘liq ishga tushirilishi ta’minlanadi.

2022-yil 1-avgustdan o‘quv guruhlarini ro‘yxatga olish, shuningdek, haydovchilikka nomzodlardan imtihonlarni qabul qilish uchun hujjatlarni va milliy haydovchilik guvohnomasini rasmiylashtirish uchun barcha tegishli hujjatlar faqat YIDXP orqali taqdim etiladi.

Bundan avval O‘zbekistonda transportda sodir etilgan ayrim huquqbuzarliklar uchun jarimalar miqdorlari o‘zgartirilgani, Shavkat Mirziyoyev “parkovka” qoidabuzarlariga solinadigan jarimalarni pasaytirish to‘g‘risidagi qonunni imzolagani hamda O‘zbekistonda 18 turdagi ma’lumot va hujjatning aholi hamda tadbirkorlardan talab qilinishi bekor qilinishi haqida xabar berilgandi.