Ijtimoiy tarmoqlarda Qo‘yliqdagi yo‘l o‘tkazgichni ta’mirlashda eski va bo‘laklardan ulangan armaturalar ishlatilayotgani aytilgan videotasvir tarqaldi. “O‘zbekiston temir yo‘llari” bunga munosabat bildirdi.
Qayd etilishicha, videotasvirda Toshkentning Farg‘ona yo‘li ko‘chasi bilan Toshkent halqa avtomobil yo‘li kesishmasidagi 1999-yilda qurilgan yo‘l o‘tkazgichni ta’mirlash jarayoni aks ettirilgan.
“Mazkur xavotirli xabar, avvalambor, asossiz ekanligini ta’kidlaymiz va ushbu armaturalar aslida ta’mir vaqtida geodezistlar tomonidan ishlatiladigan yordamchi ish quroli sifatida qo‘llanib, yo‘l o‘tkazgichning tarkibiy qismiga kirmaydi. Ya’ni videotasvirda o‘rin olgan obyekt qismida piyodalar yo‘lagi chetiga o‘rnatiladigan dekorativ plitalarni montaj paytida o‘z nuqtasidan siljib ketishining oldini olish maqsadida o‘rnatiladi va oraliqlari betonlangandan so‘ng kesib olib tashlanadi”, — deb ta’kidlagan xabarda va ta’mirlash jarayoni, qayd etilgan armaturalar va qisman tugatilgan ish aks etgan surat ilova qilingan.
“Ta’kidlash joizki, piyodalar yo‘lagi ikkita yig‘ma temir-beton bloklardan, ya’ni g‘ildirak qaytaruvchi brus va dekorativ plitalardan iborat bo‘lib, ushbu elementlarning armatura chiqarmalari (vipusklari) yordamida ko‘prikning mavjud oraliq qurilmalariga hamda o‘zaro bir-biriga elektr payvandlash vositasida biriktiriladi. Shundan so‘ng biriktirish choklariga monolit beton yotqizilib, yanada mustahkamlanadi. Monolit beton o‘z ichida qolgan armaturaning chirishdan muhofazalaydi”, — deyiladi “O‘zbekiston temir yo‘llari” munosabatida.
Shuningdek, ushbu qurilish-montaj ishlari o‘rnatilgan tartibda ishlab chiqilgan loyiha hujjatlari va chizmalariga asoslanib bajarilishi va unda qo‘llangan qurilish materiallarining sifati qat’iy ravishda tegishli nazorat idoralari tomonidan muntazam nazorat qilinishi bildirib o‘tilgan.
Izoh (0)