Ижтимоий тармоқларда Қўйлиқдаги йўл ўтказгични таъмирлашда эски ва бўлаклардан уланган арматуралар ишлатилаётгани айтилган видеотасвир тарқалди. «Ўзбекистон темир йўллари» бунга муносабат билдирди.
Қайд этилишича, видеотасвирда Тошкентнинг Фарғона йўли кўчаси билан Тошкент ҳалқа автомобиль йўли кесишмасидаги 1999 йилда қурилган йўл ўтказгични таъмирлаш жараёни акс эттирилган.
«Мазкур хавотирли хабар, авваламбор, асоссиз эканлигини таъкидлаймиз ва ушбу арматуралар аслида таъмир вақтида геодезистлар томонидан ишлатиладиган ёрдамчи иш қуроли сифатида қўлланиб, йўл ўтказгичнинг таркибий қисмига кирмайди. Яъни видеотасвирда ўрин олган объект қисмида пиёдалар йўлаги четига ўрнатиладиган декоратив плиталарни монтаж пайтида ўз нуқтасидан силжиб кетишининг олдини олиш мақсадида ўрнатилади ва оралиқлари бетонлангандан сўнг кесиб олиб ташланади», — деб таъкидлаган хабарда ва таъмирлаш жараёни, қайд этилган арматуралар ва қисман тугатилган иш акс этган сурат илова қилинган.
«Таъкидлаш жоизки, пиёдалар йўлаги иккита йиғма темир-бетон блоклардан, яъни ғилдирак қайтарувчи брус ва декоратив плиталардан иборат бўлиб, ушбу элементларнинг арматура чиқармалари (випусклари) ёрдамида кўприкнинг мавжуд оралиқ қурилмаларига ҳамда ўзаро бир-бирига электр пайвандлаш воситасида бириктирилади. Шундан сўнг бириктириш чокларига монолит бетон ётқизилиб, янада мустаҳкамланади. Монолит бетон ўз ичида қолган арматуранинг чиришдан муҳофазалайди», — дейилади «Ўзбекистон темир йўллари» муносабатида.
Шунингдек, ушбу қурилиш-монтаж ишлари ўрнатилган тартибда ишлаб чиқилган лойиҳа ҳужжатлари ва чизмаларига асосланиб бажарилиши ва унда қўлланган қурилиш материалларининг сифати қатъий равишда тегишли назорат идоралари томонидан мунтазам назорат қилиниши билдириб ўтилган.
Изоҳ (0)