UzAuto Motors АЖ Chevrolet Captiva-5 автомобилини етказиб бериш бўйича бекор қилинган шартномаларнинг маблағларини қайтариши ва компенсация тўланишини маълум қилди.
Ноябрь ойи ўрталарида ижтимоий тармоқларда Chevrolet Captiva-5 автомобили учун тўлов қилган харидорлар автосалонлар ва UzAuto Motors масъуллари билан боғланиб, уларга машина гўёки «минтақамизга тўғри келмагани учун» етказиб берилмаслиги, тўловни ё бутунлигича қайтариб олиш ёки бошқа модель хариди учун йўналтириш тавсия этилаётгани ҳақида хабарлар тарқалган эди. Орадан салкам бир ҳафта ўтиб, UzAuto Motors компанияси Captiva-5 бўйича шартномалар тузишни тўхтатишга «мажбур бўлаётгани»ни эълон қилди.
Ўшанда мижозлар мурожаатидан кейин 3 кун ичида тузилган шартномалар бўйича тўланган барча маблағлар тўлиқ қайтарилиши, шунингдек, компания қўшимча равишда олдиндан тўлов суммасининг 5 фоизини компенсация сифатида тақдим этилиши маълум қилганди.
UzAuto Motors’нинг маълум қилишича, Chevrolet Captiva-5 автомобили бўйича жами 461 та шартнома пули тўланган. Айни пайтда 207 нафар харидор Chevrolet Captiva-5 автомобили ўрнига бошқа автомобилни олишга қарор қилган, 161 нафари эса тўланган маблағни қайтарилиши учун ариза билан мурожаат қилган ва аллақачон пулларини қайтариб олган. 41 нафар мижоз кечаги кундан бошлаб компенсация сифатида тақдим этилган 5 фоизлик тўлов суммасини олган.
Таъкидланишича, қолган харидорлар ҳам ўз маблағлари ва компенсацияни яқин икки-уч кун ичида олади.
Маълумот учун, Captiva модели Ўзбекистон бозорига 2007 йилда кириб келган. Ўша йилнинг октябрида мамлакатда автомобилни йиғиш йўлга қўйилган. 2011 йилнинг сентябри ва 2017 йилнинг февралида модель янгиланган. 2018 йилнинг сентябрида эса GM’нинг глобал стратегиясига мувофиқ уни ишлаб чиқариш тўхтатилган.
Изоҳ (0)